10. majs. Viļānu tierga breinumi
Navarieju nikai sasataiseit i īlikt Viļānu tierga karteņu. Pa tū laiku Anna Rancāne jau seņ publicēja sovu rokstu par tiergu, nūpierktī raibī syvāni īsavuicēja tikt uorā nu aizgoldys, īsasuoce vosora.
A syvāni nav ar maisu systi – īlein škierbā aiz škūrstiņa, pa ceglim izkuop iz plitys i tod nūlāc zemē. Volkojās pa vystu duorzu i ryuc kai ļovi.
Nu suoku gaiļam beja šoks, stuovēja i bļaustējēs. Niu jau pīrads. Vodoj vysu vystu saimi i nasalīk ni prast.
Kai syvāni klāvā, tai depreseja i aste kircinej kai lupateņa. Kai spryuk uorā, tai drypastoj i prīceigi ryuc, daguns zemē i aste gryndzynā. Tai kai taidi biroja darbinīki!
Tod syvāni izdūmuoja, ka cyuka var i rakt, var i narakt. Ka narakt, ir tok cytys izklaidis. Par pīmāru, zagt vystom gordumus.
Niu maja vabaļu pylni vysi kūka zoru. Papurynoj i bierst kai pupys. Vystys čārkdamys kreit viersā.
Kū syvāni? Kai smejīs, dzeive ir lels buļbu teirums; kurs leluoks cyuka, tys vaira pīrūk. Syvāni pakaļ vystom i tože ād vabalis, ka kroukst vīn! Vystom vēļ leluoks šoks. Raibys vystys iz četru kuoju, ād tū pošu, kū juos!
Sovam karteņu nalikšonys slinkumam attaisnuojums – puors gudru teicīņu nu aforismu kolekcejis.
Ar acim dorbu naīveiksi.
Ar, kai var!
Ar pruotu Reigā staigoj, ar dorbim vuoļojās iz cepļa.
Ka laika nabeja, ar navaru saceit. Partū ka drystynam nikod nav laika gona.
Tok, kū lai tī soka – asu slinka kai maita. Kaida vuorna pārta, taida i napārta.
Vīneiguo cereiba… Atsazeišona ir ceļš iz izalobuošonu. 🙂
Nasmuodejit i nalomojit. 🙂 Kai smejīs, dūd myrušam slavu, dzeivajam mīlesteibu. Dzeivu pažāluot vys lobuok nakai myrušu pīminēt. Vys jau lobuok nakai: Ka jis myra, spyrys byra, nivīns gauži narauduoja.
Paļdis Sandrai Kalnītei par īdvasmu! Kab na juos dīnroksta par ceļuojumu pa Latgolu, es laikam nabyutu sasajāmuse itai galerejai ar 107 karteņom. Mozuok navarieju. Kūd kurā pierstā gribi, vysi sovi.
Ak jau sasatiksim tiergā Viļānūs. Kotra mieneša ūtrajā svātdīnē.
Realajā, ni atkluotneišu, vieleišonu laika i jiusmeigūs paņteņu Latgolā.
(107 tierga kartenis atrūnamys ite)