Volūdys Vaicuojums / burts Y
![](https://lpr.gov.lv/wp-content/uploads/2007/lauds/403.jpg)
Šudiņ mes parunuosim par īpašu burteņu, kura nav lejslatvīšim, a Latgalīšu rokstu volūdys alfabetā tys ir – taitod runa byus pa cītū y voi igreka burteņu…
Vītu vuordu ar itū burteņu suokumā navarēšu Jiusim nūsaukt, jo itam burtam daudz vairuok pateik dzeivuotīs pa vuordu īkšīni, golūtnem, a nikai napateik byut kai tautā soka – par „prīkšys pluocini”.
Bet na jau vysod svareiguokais ir tys, kurs bez apstuojis pa prīšku grūzuos. Tai ir nūtics ari ar itū burteņu. Vasalu revoļuceju, sova veida apvārsumu izsauce tys, ka gon latgalīšu uzvuordūs, gon sātu i vītu vuordūs, tai sauktuos tūs latviskuošonys rezultatā brašī tāva dāli Cyukori, Cyukmači, Bryuveri, Gryudinīši, Pyupuļnīki, Myurinīki palyka par Ciukorim, Ciukmačim, Briuverim, Griudinīšim, Piupuļnīkim, Miurinīkim. A vītu vuordi, par pīmāru, Lyuzinīki par Liuzinīkim, Lyuža, kur pīdzyma i izauga rakstnīks Juoņs Klīdziejs, par Liužu, Cybuli par Cibulim, Cyskodi par Ciskodim, Gryušļova par Griušļovu, Pryuši par Priušim, Styuraini par Stiurainim.. A Cyrms par Cirmu. Ari nu Cārmyna azara niu izguoja Cārmins.
Vot jiusim – i kas ta tī – vīns burteņš vuordā! Na veļti tautā ir teicīņs: klusuo cyuka dziļu sakni rūk.
A niu vīnkuorši pasaklausēsim kai tekstā skaņ myusu seviškais burteņš y:
Atguoja rudiņs. Myusu pyune pylna sīna. Klietī orūdūs sabārti gryudi. Dreiži byus zīma. Seņuok zīmā meitys lūceja pyuru. Ustobuos ryuce rateni. Pyurā vajadzēja byut daudz austu i šyutu driebu. Audaklus kruosuoja kryukļa myzuos i cytuos zuolēs. Mozī bārni sēdēja iz myureiša i lyudzēs, lai kurs pastuosta kaidu puosoku. Myusu babeņa šyudama voi adeidama stuosteja puosokys par lopsu, luoci, zači, ezi. Tāvs, byudams medinīks, daudz zynuoja par vylku, lyušu, meža cyuku dzeivi.
Tyka mynātys ari meiklis: pamieginoj atminēt ari tu!
1. Cyuka caur sarim pyuš. (tei ir
2. Kurus zuobokus šyun iz loktys? ( deļ zyrga kuoju ap-kaļ-šo-nys)
3. Pyust gon pyuš, bet nikuo naād. (pliešys ka-ļvē)
4. Stuļpeņš syunā, gaļdeņš viersā.()
Mini, mini meikleiti! A par gūdu itam naparostajam burteņam y latgalīšu rokstu volūdys alfabetā es jiusim pasaceišu prīškā ari meikļu atminiejumus! Ir tok pavasars, kod atbiļdi iz meikli vēļ gribīs dzierdēt, a golvu lauzeit vaira nav spāka. I tai….
1. pierts kruosne 2. zyrga pokovi 3. pliešys kaļvē 4. sieņs
Vysu lobu!