Volūdys vaicuojums: burts “R”

Esit sveicynuoti! Volūdys vaicuojumā kūpā ar Jiusim Maruta Latkovska. Itūreiz parunuosim par vuordim, kuri atsaškir nu lejslatvīšu i suocās ar burtu “R”. Kai jau tys ir īsuokts, pyrma nūsaukšu vītu vuordus, kurim itys burts ir suokumā: Raipole, Raunīši, Rimšāni, Rudāni, Rudzāti, Reidzāni, Ričiki, Rībeni, Rykova, Ryuči, Rundāni, Riņči, Rogovka, Rancāni, Ratinīki, Rāzna, Rejnīki, Romuli, Rudzeiši, Ruguoji, Ruskulova, Ružyna, Rūbežnīki, Rūdovi, Rūžupe.

A niu giusimēs pi vuordeņu ar suokuma burteņu “R”, kuri atsaškir nu lejslatvīšu: ragaiņs, ari ragačs, roguļs – spīļarkls, ari ritiņa styure, a randavuot ir reņtēt.

Ragaiņs – lomu vuords, ari valns, ari būrs,
Raitu, juošus iz zyrga,
Rasāds – lecekts, dāsti lecektī, romuleni, romuleiši ir kumeleitis, tai itū cīši popularū uorstnīceibys augu sauc Kruoslovys pusē, rasine ir parastais rasaskrēsliņš,
roskodnīki ir efeju sētložņa, a ruduks ir rutks,
rūta ir asparāgs, rūzeitis ir meža malva, a rūžeņa ir tītenis,
Raštans – ir blieņdars, a rataste – lela pele, žurka,
Raudive – meža peile, a raudzeit ir mieginuot,
Reitiškys – brokastis, a reminis – duorza zeminis,
Režgētīs – mazgluotīs, a rēdēt – ir mudynuot iz dorbu, izreikuot,
Ripeleišona ir spēle, a ritavenis – naleidzons ceļš,
Rībt ir burt, a ruods ir prīceigs, apmīrynuots,
Ryucs, ryuceits ir strauts, strauteņš – a ryuguss – saryudzs pīns,
Rožonca ir lyugšonu kūpa, ari lyugšonu krellis,
Rokstu braukt – braukt da bazneickunga, lai pīsaraksteitu iz lauleibu,
Ratavuot – gluobt, paleidzēt,
Ruomēt ir kastrēt, a ruomičs – rūniķis,
Rondons ir remdens, a rundieļs – kauss ar zamom molom i garu rūkturi,
Runkuļs ir lūpbareibys bīte, a rupucs ir krupis,
Rūcinīks ir spryguļs, ari vāza, ari izkapts rūkturs,
Rūčinīks, ručnīks ir dvīļs, a rūzētīs ir staipeitīs, gūreitīs,
Reps – ir tabakys moks. Franča Trasuna fabulā „Zeps i peipe”, ir taidys ryndys:

• iz jumta beja izatrauss Zeps, aiz jūstys jam beja aizbuosts tabāka reps. Tei līta Zepam parosta ar peipi zūbūs jumtam jaunys cysys likt. Jumtu luopēt nav jau slikt, bet tys bej` slikt, ka jumts nu peipis suoka sviļt i diļt kai korstā saulē pavasara snīgs, ka Zepam puorguo snaudūne i mīgs, verīs muojis izputēs vot, vot. Par laimi kaimiņs gadējēs i jumtam dali nūplēse, ar iudini tū aizlēja, lai gon i peipi zemē nūsvīde, tei saduza… Tai Zepeits beja gluobts. A Zeps jū lomuoja: tu padauza, tu napraška, kai cierva pīšs, kai kuots, a kaimiņs breinuojuos: par kū? Tu nazini? Par tū, ka peipi saberzi i dorbu izjauci.

Redzit, kaida stypra muoceiba nu ituos fabulys, ka esi sasagatavejs iz jumta remontu, tod tabaka repi i peipi gon darātu pamest sātā. I pi vīna muocēt paļdis pascēt ūtram par loba darejumu.

Vysu lobu!