Volūdys Vaicuojums / burti “Z” i “Ž”

Kai tī myusim ir guojs, naguojs, a šudiņ jau asam dasabiriejuši pi pādejūs alfabeta burteņu z i ž. Ari šudiņ mes apsavērsim vuordus, kur tī kolpoj kai suokumburts nu lejslatvīšu atškireigajūs nūsaukumūs.

Tūmār suoksim ar vītu vuordim. I tai:
Zači, Zalāni, Zaltakolns, Zaltapūrs, Zaļmuiža, Zeili, Zeileva, Zeiļusola, Zaļūkšni, Zeļči, Zeizys, Zepi, Zylupe, Zyrgusola, Zīmeļovka. Znūteni, Zosna, Zundāni, Zukuli, Zviergzdine, Zvindzeliški, Zambari, Zīmaiži, Zukuli, Zuiči, Žaunerāni, Žeiguri, Žeikari, Žmuidzyni, Žogotys, Žubuli, Žureili, Žureilys.

A niu par cytim vuordim.
Zababoni ir aizspriedumi, a zacirka – pīna klimpu zupa,
Zadynuot ir amizētīs, ari lyugtīs, a zagiuze ir dzeguze,
Zakonneica ir mūķene, a zakristians – pērminderis katoļu bazneicā,
Zam ailis ir piec kuortys, a zaponkys ir aprūču pūgys,
Zebonka ir auzu kule zyrga baruošonai ceļā, a zīčēt ir līnēt – aizajimt,
Zīstīs ir smērētīs, a zlaukts, nu vīna kūka izdūbts trauks sātys ola tacynuošonai, ari vīnkūcs,
Zuobočnīks – apovu meistars, a zuopere – vanckars, ūla, nu kurys nav izguojs cuoļs,
Zuomauka ir čyuskys nūsvīstuo uoda, a zūsyns – zūsu tieveņš,
Žautīs ir krist, a žeirs ir kubuls ols bryuveišonai,
Žepers, ari žuburs ir egleite voi prīdeite ar daleji apcierstim zorim sīna voi labeibys kaļteišonai,
Ževeri ir zuodžu skaidys, a žņaulēt ir kūšļuot,
Žubuks ir zuords labeibys voi lynsāklu kaļteišonai, salykts nu žeperu,
Žugure ir stārķis, a žeiguri ir zvierbuli,
Žvyrs ir graņts, ari naaugleiga, grantaina zeme,
Žvūrdzyns ir rūtaļlīta nu kaula pūgys, kura izvārta caur dīgu i kustynojūt grīžās ar žvūrdzūšu skani. A žvūrgt ir ryukt, dyukt.
A niu par augu vuordim. Žibacteņa ir vyzbuleite, a žyužuoni, žyužainis ir pelašķi,
žuļtinis, žuļktinis ir strutinis, a zača auzenis ir vyzuli, tuos mīļoj augt pa vacainem,
sovukuort zača kuopusti ir meža zaķskābene, a zemneicys ir meža zeminis,
zvaneni – ir teiruma puļkstineite, a zača kanepe – parostais vyzuļs.

Itūs vuordu i vīnkuorši burta z,ž sakareibā Lidejis Leikumys i Jura Cybuļa lementarī voi ābecē ir kaidys breineigys meiklis:

Pīmāram, žabārklu gaspaža vysus teirumus apdoncoj. Nu, prūtama līta, ka tei ir ecieža.

Nu a kas ir žuburs pi žubura aste pi astis? Nui. Tys ir labeibys zuords: žeperi i vuorpys, kurys draudzeigi ryndojās vīna pi ūtrys.
I vysbeidzūt – meža uožam lynu buorda – kas tys ir?

Myusu jaunajai paaudzei tū pavysam gryuši īsadūmot, bet tim, kuri sakruojuši vysai cīnejamu godu skaitu, drūši viņ atminiejums jau seņ rūkā. Jo…meža uozs ar lynu buordu nav nikas cyts kai spriežamais rateņš ar lynu kūdeli. Taipoš itymā burtu z,ž galerejā vysai labi īsadar ari tei mozuo, mozuo sīveņa, kura franciski runoj: ”Žagfut, žagfut!” , a saucās vīnkuorši par žogotu.

Vysu lobu!