Volūdys Vaicuojums / burti U, Ū, V
![](https://lpr.gov.lv/wp-content/uploads/2007/lauds/403.jpg)
Pyrma nūsaukšu jiusim kaidus vītu vuordus ar itim suokuma burtim:
Undrukāni, Unguri, Upinīki, Upmola, Užynkolns, Ūglinīki, Ūgļova, Ūgrinīki, Ūšinīki, Ūzulaine, Ūzuleni, Ūzulmuiža, Ūzulova,Ūzuļnīki, Vabale, Vacpiļs, Varakļuoni, Viļaka, Viļāni, Vylcāni, Vylkova, Vonogi,Vuorkali, Vuorkova, Vuoveri,Vagali, Vaivodi, Valaini, Vuornaiši, Vaičuli,Veceli, Veiguli, Veiksna, Veipi, Vierdeni, Vieveri, Vieži, Vydsmuiža, Vyduči, Vyrauds (azars), Vyški, Viļumāni, Viļuši, Voini (ari Voiniškys), Voiti, Vuškusola.
A niu par cytim vuordim.
Ubogine, ubogīne ir iedīņs nu maizis gabaleņu iudinī, ari nabogmuoja,
Učaska, ari učastka, ari daļders ir 24 – 30 ha zemis ar 4 – 6 nalelom saimnīceibom,
Ukuots – ir reiks pūda izjimšonai nu kruosnes,
Uļbiks – guļba, a uļbineica, ari uļbaite – nūvuokts guļbu teirums,
Upārts – patmīleigs, izlutynuots bārns,
Ūluoknis, ari ūlinīks – iedīņs nu pīna, ūlu i beidalātu myltu,
Ūļavuot, ari gūļuot – svinēt, uzdeivuot, ari nikuo nadareit, sēdēt rūkys kliepī salykušim,
Ūmai – ir piekšņi, nagaidūt, vacaine ir atmota, a vaciks, vacata ir dzeds i baba,
Vacumi ir bārnu, ari jaunu meitu slimeiba, a izapauž jei tai, ka cylvāks nikuo naād, nūvuojej, rakstureiga dzeļltineiga uodys kruosa,
Vaicuojums – ir jautuojums, a vaiņuks – vainags,
Vaidi – kars, a valātive ir sūls driebu velēšonai, ari cīši klačeiga sīvīte,
Valis voga – tukša voga, kurā nikas nav īstateits,
Vanginīks, cylvāks, kas seņuok struoduoja pi kungim, ari giusteknis,
Varažbits – zeiļnīks, varažuot – zeilēt, burt,
Varganis ir iergelis, a varganists – iergeļnīks,
Varstaks ir ieveļsūls, a vapna – kaļkis, vapnineica – kaļka ceplis,
Vasars ir āmurs, a vataiņs, ari vataviks – vateits mieteļs,
Vataunīks ir vateita saga, ari koldris,
Vazounīks, vazonnīks – puču pūds, a vozyune – ratneica, pīdorbs, molkys škiuņs,
Vāpla, ari vjāpla – viejagruobsle, a vāzda, ari vāza – kūja, nūja,
Vece ir vaca sīvīte, a veceļs – veceits,
Večerinka ir jaunu cylvāku „sasadoncuošona”parosti svātdīņu vokorūs, bez alkoholiskūs dzierīņu lītuošonys,
Veikštīs – ir pūstīs, gatavuotīs ceļam, a veilīņs ir sīns sagruobts leluokā vuolā, ari kluojīņs,
Vīteits ir kiupynuots, a veižuons – cylvāks, kas staigoj veizēs, ari veceigs, nastolts guojiejs,
Vejūklis – īreice dīgu teišonai komulī, a vendzelks, vendzelka – pauna, kas sasīta kaidā drēbē,
Vestīs – atsanest, a viejineica, ari viejauka – mašina labeibys vieteišonai, ari pādejuo škārsbolka kūka guļbyuvē,
Vēkšt ir blēt, a vierseiba ir prīkšnīceiba,
I vysubeidzūt vuords vierbineica – tei ir gon Pyupūlu svātdine, gon pats augs – vierba, vierbineica ir pūpolvītols. Vēļ daži cyti augu vuordi: uobūleņš ir zīmys mārpučeite, vanadzs ir pļovys dedesteņa, vanadzeiši ir dzaltonuo akāceja, vanagieļs ir vanagu vīķis (vika), veigrīškys, ari veidryukši ir vīgriezes, veitūleni ir miķelītes, veivierni, ari kukuži, ari kukuči ir pūra vaivareni, veibūtnis, viejputis, ari viejputi ir parastā vībotne, vengris ir sarkanais plūškoks, vieja gruobeklis ir velna rutku grābeklīte, vieršni ir sila virši, viezeiši – kuodīgais laimiņš, vylku ūgys – čūskuoga, vuoleite,zyluo,ari boltuo ir ķekaru muskare, vuolonta, ari leluo zuole ir ālante, ari staģe. Vuolonta ir na viņ izcyls uorstnīceibys augs, bet tū īsoka stateit ari guļbu duorzu tyvumā, jo vysim tik labi pazeistamajai vabalei nu Amerikys Kolorado štata tei pi sirds naejūt. Lai Dīvs dūd, i lai dzeivoj vuolonta!
Vysu lobu!