Vokora styga “Latgaliskuo meklejumi Reigā” (PAPYLDYNUOTS!)
Piec vosorys breivdīnom školānim otkon suocās vuiceibys školā, studentim – studejis. Daudzi, kab nasaceitu vaira, apgiut augstuokuos zineibys brauc iz Reigu. Ari latgalīši. Koč leidz Latgolai ir lobs gobols, izaruoda, ka ari Reigā var sastapt zynomus vuordus, cylvākus i vītys, kurys saistuos ar Latgolu.
Ideja meklēt latgaliskū Reigā roduos jau lobu laiku atpakaļ, tik vys tik nasaguoja tū eistynuot. Augustā „Latgolys Studentu centra” bīdri, kuri studej i/voi struodoj Reigā, salyka golvys i spākus kūpā, kab pasuokums nūtyktu.
I tai – iz „Latgolys Studentu centra” aicynuojumu meklēt latgaliskū kūpā vokora stygā „Latgaliskuo mekliejumi Reigā” 2008. gods 3. septembrī atsasauce ap 30 dalinīku, kuri puorstuov dažaidys augstškolys.
Pyrmais puorbaudejums dalinīkim beja Reigys Goreiguo seminara atrašona. Cikom gaidejom kavātuojus i tūs, kuri aizblūdejuši, RGS studenti stuosteja par sovu školu i sevi.
Piec ekskursejis pa seminaru pogolmā vysi tyka aicynuoti sasatuot pa komandom. Saguoja vasalys 7: „Elfi”, „Ūtruo komanda”, „Žypereigī”, „L – 4”, „Da Best”, „Ezeiši myglā” i „Vacī buki”. Cikom napacīteiguokī sajāme starta signalu, komandys, kurom juogaida, runuojās ar seminaristim.
Pavysam komandom Latgolys prīškpiļsātā, Vacreigā, i tai saucamajā Reigys klusajā centrā beja juoatrūn 10 kontrolpunkti, kurim ir saisteiba ar Latgolu, juopylda dažaidi aizdavumi, juomeklej atbiļdis iz vaicuojumim, juoparuoda sova atjauteiba, juofotografej Latgolys vītvuordi itt.
Nūslāgums beja Esplanadē pi Raiņa pīminekļa. Dalinīki skaiteja sovys – vokora stygys laikā topušuos ailis, dzīduoja kūpā ar Veron Martin i puišim nu „Bez PVN”.
Vyslobuok ar aizdavumim golā tyka komanda „Da Best”, ūtrī palyka „Vacī buki”, nu jūs pavysam nadaudz atpalyka „Žypereigī”.
LgSC soka lelu paļdis vysim dalinīkim, RGS seminaristim i Edgaram Cakulam, Verneram, “Bez PVN” puišim i tym, kuri pīlyka sovu rūku, kab pasuokums nūtyktu! 🙂
