Vierteis “Latgales enerģijas” sovumu apkeiluošonas pamatuoteibu
Reigas apgoboltīsa šudiņ plkst.15.30 paredziejuse viertīs vaicuojumu par tū, voi atceļams Latgolas apgoboltīsas lāmums nūdrūšynuot AS “Rēzeknes siltumtīkli” praseibu i apkeiluot SIA “Latgales enerģija” kustomū montu i naudu par vaira nakai 880 000 latu.Jau ziņuots, ka beidzamuo goda 20.septembrī “Rēzeknes siltumtīkli” īsnīdze Latgolas apgoboltīsā praseibas dasacejumu pret “Latgales enerģiju”, lyudzūt dadzeit nu uzjāmuma par lobu “Rēzeknes siltumtīkliem” nūmys moksu par aktivu nūmu, leigumstruopi i poruodu par nasamoksuotū gāzi.
Preiļu nūvoda dūme nūlāme jemt Valsts kasē 150 000 latu aizdavumu Preiļu 2.vidusškolas dorbneicu renovacejai. Itamā šaļtī Preiļu 2.vidusškolas dorbneicu renovacejas dorbi jau ir suokti. Dorbneicu renovaceja paradz jaunas pībyuvis byuvnīceibu, uorejū durovu i lūgu nūmaiņi, fasadis izbyuvi, jauna jumta saguma izkluošonu, ventilacejas sistemu izbyuvi, elektroinstalaceju izbyuvi, sanitarū mazglu renovaceju i vel cytus remontdorbus.
Turisma godatiergā “Balttour 2008” Latgolas stendam atvielāta vysleluokuo plateiba – 156 kvadratmetri, kur sovejū pīduovojumu izvītuos seši rajoni i divejis pylsātas -Riezekne i Daugavpils. Pīvadumam, Ludzas rajonu puorstuovēs diveji rajona uzņāmumi “Cirmas ezerkrasts” i “Ludzas Amatnieku Centrs”. 9.i 10. febrarī izstuodis ītvorūs izastuos folkloras ansambls “Dyrbini”, Laua Bicāne, Arturs Uškāns ar folkloras kūpu “Vabalis” i grupa “Dabasu Durovys”. Starptautiskuo izstuode “Balttour” itamā godā svin 15. godskuortu. Itamā godā izstuode pyrmū reizi nūtiks divejuos hallēs. Vīnā hallē sevi prezenties Latvejas pylsātas i nūvodi, bet ūtramā hallē atsarass turoperatoru, aģenturu, gostneicu, kai arī uorvalstu nacionalī stendi.
Nu šudiņes da 8.februaram ar izvadumu “Es visur aicināts un izraidīts …” Daugavpils teatrs gasteis Baškirejas golvaspylsātā Ufā. Izruodis nūsaukums ir pyrmuo rynda nu slavenuo franču dzejnīka Fransuā Vijona dzejūļa. Itei ir muzikala izruode par ļubesteibas “biografeju”, – nu Šekspīra, Bodlēra, Vijona da Ziedonim i Čaklajam… par trauslū, skaistū, demoniskū ļubesteibas spāku i varu.
