Vacuokais latgalīšu festivals

20. septembrī Bolvu rajona Škilbānu pogosta Upītē nūtyka jau sastais „Taiseits Latgolā/Made in Latgola” pasuokums. Andris Slišāns ar paleigim saorganizeja latgalīšu dzīšmu i meilys aiļu festivalu ar nūsaukumu „Upītes Uobeļduorzs” – tys ir ikgadejais i, kai poši organizatori atzeimejuši, vacuokais latgalīšu muzykys festivals iz pasauļa, deļ tam ka tyka reikuots jau septeitū godu piec kuortys.

Nu vokora da reitam muzykanti pīskandynova Upītes Tautys noma sīnys: „Karborators” (vīna nu vacuokajom rokgrupom vysā Latvejā); „Dyrbyni”, Artūrs Upīts, Vinsents Kūkuojs, Laura Bicāne, Laura_Laura, „Stage-on”, „Patrioti.LG”, „Crust”, „Likteneigais pagrīzīņs iz Vainovu”, „Dabasu Durovys”, „Bez PVN”, „Green Novice”, „New Buzz” i „VM”. Paleigūs guoja ari literati Ontons Slišāns, Mārīte Slišāne, Santa Matisāne, Jurs Viļums i Raibīs Suņs.

Pasuokuma laikā prīškā tyka stateits „Dabasu Durovu” albums „Ļepetņīks”, kai ari O. Slišāns pīduovuoja sovu gruomotu „Salve Regina”, kas ir erotiskūs meilys aiļu kruojumeņš, kurš naseņ īgivs vysleluokū atzineibu portala „Delfi.lv” skaiteituoju vydā.

Reizī itais pasuokums beja ari nūslāgums Latgolys Kulturys programmys (administrej Latgolys regiona atteisteibys agentura, finansejumu snīdz Kulturkapitala fonds) atbaļsteitajam projektam, kura ītvorūs tyka reikuots vysmoz pa vīnam latgalīšu muzykys pasuokumam kotrā Latgolys rajonā.