Ui, loba Borowa!

20.oktobrī Latvejis Dzelzceļa viesturis muzeja viļcīņa vagonā ar drūšeibys instrukcejis atskaņuošonu suocēs „braucīņs” Reiga – Borowa, kas reizē beja ari prezentacejis pasuokums latgalīšu modernuos muzykys grupys Borowa Mc jaunajam, nu jau piec skaita trešajam albumam „Ui, lobs!”

Gostim – grupys tyvuokajim draugim, atbaļsteituojim i plašsazinis leidzekļu puorstuovim – prezentaceja tyka veiduota kai kūpeiga jaunuo albuma nūsaklauseišona, grupys dalinīkim izstuostūt interesantuokū par kotrys dzīsmes tapšonu. Par jaunajom dzīsmem izasaceja ari Borowa Mc atbalsteituoji i draugi.

Latvejis Instituta direktors Ojārs Kalniņš atsazyna, ka ir lels grupys fans, pasceja paļdis par draudzeibu i grupys atsauceibu, izveidojūt dzīsmi „Iededzies par Latviju”, kai ari izsaceja atzineibu par grupys lidera Aigara Runča i menedžera Aivara Līpenīša duovonu Latvejai – akceju „Skrien! Par Latviju”, kas oktobra vydā giva nagaideitu atsauceibu. Sovukuort grupys Z-Scars solists Andris Kivičs palyudze Aigara autografu iz stafetis skriejīņa daleibnīka T-krakla, kas Andram jau beja mugurā.

Kinorežisors Juoņs Streičs latgaliski paude prīku par tū, ka ir grupys lobs draugs, kai ari aicynova namiereit vaļsti i Latgolu piec geografiskajim voi skaitliskajim lelumim, bet piec padareitajim dorbim. Runojūt par albuma pyrmū dzīsmi „Es tevi gaidiešu”, režosors izsaceja vieliejumu byut lapnim ar sovu nūvodu i vaļsti i ar lelim dorbim pīruodeit sovu lelumu.

Gostūs beja ari profesore Janīna Kursīte-Pakule i puorstuovi nu Latgalīšu Kulturys Gazetys (LaKuGa.LV) – kotrs nu atbaļsteituojim i sadarbeibys partnerim nu A. Runča sajieme pa diskam i vylnys zeču puoram ar īadeitu uzrokstu Borowa Mc.

Borowa Mc leldrauga veikalu teikla Maxima puorstuovs – efektologs Centis Ūbele – kai vysod smaideigs, prīcovās par volūdys daudzveideibys veicynuošonu, kai ari prīcovās par tū, ka prezentacejis laikā ar sajiusmu tyka pījimts leldrauga saguoduotais gastins – kai jau viļcīņam pīstuov – pončiki, korstveins i čajs.

Albumā „Ui, lobs!” dzīsmes kūpā ar Borowa Mc īdzīduojuši: Aisha, Artis Dvarionas, Juris Kaukulis, Fēlikss Kigelis, „Vilki” i Leila Alijeva. Piec atsagrīsšonys grupā, vīnu dzīsmi albumā īdzīduojuse Borowa Mc suokūtnejuo dalineica Guntra Kuzmina.
Piec tam novembra mieneša garumā grupa Borowa Mc, gastejūt dažaiduos Latvijis vītuos, eistynuoja ari albuma prezentacejis mini tūri, kas suocēs 1. novembrī, ar emocejom pylnu koncertu Reigā, klubā „Četri Balti Krekli”, kur jaunuokū grupys singlu “Iededzies par Latviju” (iedziedāts pīsadoltūt Aishai i Artim Dvarionas) klauseituoji daže naļuove dzīduot pošai grupai, ovaceju i dzīduošonys skaļumā tūs puorspiejūt. Starpcytu, itei dzīsme ari sviniejuse uzvaru Radio SWH Top20.

5. novembrī Borowa Mc beja Kurzemes pusē Kuldīgā i tymā pošā vokorā apcīmova Jelgavu, kur jaunīšu vydā popularajā klubā „Jelgavas Baltie krekli” ap pusnakti nūspielieja vēļ vīnu koncertu divuos daļuos.

Koncertturneja nūsasliedze 8. novembrī dzymtajā Latgolā – Preiļu Kuļturys centrā. „Ja kaida piļsāta gribēs, lai mes braucam gostūs ari pi jīm, mes naatsaceisim,” pastuosteja Aigars Runčis, izskaidrojūt, deļ kuo izavālātys tik nalels koncertvītu skaits.
Grupys gitarists Ingars Gusāns stuosta, ka „jaunuos dzīsmes ir pamateigs roks, deļ tuo koncertūs gitarys kombi grīžnu da golam!”
Aigars Runčis stuosta: „Vairuoki grupys muzykys atbaļsteituoji raksteja i žālovās, ka navar veikalūs atrast jaunū CD. Nauzatraucit, pītiks visim!” Muzykants ari atkluoj, ka kompaktdisku var īsaguoduot jaunajā latgalīšu interneta veikalā MadeinLatgola.LV voi disks juomeklej Latgolys gruomotu veikalūs.

Aigars nu sovys pusis vēļ atkluoja nalelu nūslāpumu – nuokušajā nedelī iz radio stacejom tiks syutāts jaunais singls „Es tevi gaidiešu”. Teik plānuotys vairuokys akcejis. Vīns nu nuokamajim koncertim byus 16.decembrī Rēzeknis Kulturys nomā, kurs byus ari eipaša duovona medikim, deļ tam jīm paradzāta īeja bez moksys (seikuoka informaceja juoprosa sovā dorba vītā voi ari juosazynoj ar grupys Borowa Mc menedžeri). Tyvuokajā laikā paradzāta ari pavysam jauna akceja, kas byus saisteita ar pavysam jaunu singlu, ar kuru grupa Borowa Mc gryb pīvierst latgalīšu uzmaneibu, „lai jī pasaver apkuort i saprūt, cik daudz myusu ir, cik daudz myusim lītu i cylvāku, par kurim(-om) byut lapnim”.

Roksta sagataveišonā izmontuoti grupys Borowa Mc materiali.