Trejūs naktī – singls i videoklips

Grupa “Dabasu Durovys” pīduovoj jaunu dzīsmi i videoklipu “Trejūs naktī”, kas ir stuosts par lītom, kurys izaver sovaiduokys kai eistineibā ir, i varbyut tūs vyspuor nav…

Dzīsme “Trejūs naktī” atguodynoj ari par tū, ka reizem tys, kū tu gaidi i nasagaidi, izaruoda mozuok vierteigs par tū, kas atīt nagaideituo vītā. Jaunuo dzīsme īkļauta ari jaunajā, tikkū izdūtajā grupys “Dabasu Durovys” pyrmajā muzykys skrytulī (diskā) “Ļepetņīks”.

Dzīsme “Trejūs naktī” īraksteita 2008.godā “Rīgas skaņu ierakstu studijā” (bungys) i “Latgolys Radejis” īrokstu studejā (instrumenti i bolss). Dzīsmi miksējs i māsteriejs Armands Treilihs. Sovulaik dzīsmis videoklips uzjimts Daugovpilī. Tū fiļmiejs i montiejs Māris Justs.

Ituo gods decembrī grupai “Dabasu Durovys” paliks 3 godi. Pa itū laiku grupa spieliejuse jau vaira kai 60 koncertūs Daugovpilī, Preiļūs, Riezeknē, Reigā, Jelgovā, Upītē, Leiksnā i cytur.. Taipoš ari izdūts pyrmais dzīsmu aļbums, izveiduots videoklips, ir sasnāgumi ar dažaidūs jaunūs grupu konkursūs i grupys dzīsmis patstuoveigi ir rotācejā Latvejis radejuos.

Grupas sastuovā muzicej Juons Veliks (bungys), Arns Slobožaņins (gitara, bolss), Edgars Kluss (gitara), Egils Kulmanis (saksofons, bolss), Sergejs Čakāns (basgitara).