Taiseits Preiļūs
Kai atzeimeja koncerta vadeituojs – latgalīts ir tys pats latvīts, bet ar kvalitatis zeimi. Itymā gadīnī teik pīduovuota kvalitatis zeime ar nūsaukumu: „Taiseits Latgolā”. Kas ir latgalīšu muzyka? Tei ir muzyka, kas dzymuse latgalīšu sirdīs – taitod taiseita Latgolā! Ari Preiļi, kai piļsāta sataiseita pyrms 80 godim – ite Latgolā. Seikuoku informaceji par cytim Preiļu piļsātys jubilejis pasuokumim meklejit škārsteikla adresā: www.preili.lv.
Vairuoki Latgolys mīsti streiduos, kur ir regiona golvyspiļsāta, tak 19.julī taišni Preili kliva par vysu latgalīšu golvyspiļsātu. Deļ tam ari vysleluokais paļdis par koncerta atbaļsteišonu tyka saceits Preiļu nūvoda dūmes prīšksādātuojam Aldim Adamovičam. Ari jis beja pagūdynuots atkuošonys runu saceit latgaliski.
Piec īvoda runom, lai „svātki napalyktu palāceigi cīši, sazasaucēs latgalīši” – apmāram itaidi vuordi ir ari grupys „Likteneigais pagrīzīņs iz Vainovu” dzīsmei. Tuoļuok jau daudzejim zynomais dzīduotuojs Weron Martin kūpā ar draugim prezenteja jaunu grupu – „Restauratori”. A „Laimas Muzykanti” ar Arturu Uškānu prīškgolā paruodeja, kai dzīd i spielej eisti latgalīši i sajieme publikys milzeigu atsauceibu.
Pauokumu papyldynova Pīters Luocs ar latgalīšu gruomotu goldu, keramiķu Valda i Olgys Pauliņu darynuojumu tierdzeņš. Latgalisku muzyku starplaikūs i vysa koncerta audioīrokstu nūdrūšynova „Latgolys Radeja”.
Jaunuokuo paaudze varbyut jau naatguodoj legendarū grupu „Elpa”, kas izveiduota pyrms 25.godim (nūsaukums radīs Ojāra Vuocīša taida poša nūsaukuma dzejūļu kruojuma īspaidā). 1986.godā, „Elpa” tyka atzeita par lobuokajim „Mikrofona aptaujis” debitantim. Sovā darbeibys laikā grupa ir spieliejuse koncertūs vysā Latvejā, Krīvejā, Boltkrīvejā, Ukrainā, Lītovā, veiksmeiga sadarbeiba izaveidovuse ar „Credo”, „Remix”, „Līvi”, „Jumprava”, „Odis”, „Sīpoli” i.c. Dīvamžāļ, 1995.godā „Elpa” puortrauce sovu darbeibu leidz ar tragiskū komponista, solista i taustiņinstrumentalista Juoņa Logina nuovi. I tikai 2008.goda suokumā tyka izveiduots jauns mūziķu sastuovs, i nu jau piec 13 godu puortraukuma grupa „Elpa” snīdze koncertu. Preiļūs beja ūtrais konncerts piec otkonapsavīnuošonys. Klauseituoju aizkustynuojums pīruoda, ka „Elpa” nav paguotne – legendys nemierst.
Pādejā laikā nivīns latgalīšu muzykys koncerts navar iztikt ari bez jaunajom, bet sevi jau pīruodejušajom latgaļu roka grupom: „Dabasu Durovys”, „Bez PVN” i „Green Novice”. „Dabasu Durovom” rudinī gaidoma pyrmuo albuma izdūšona. „Bez PVN” sovu nu jau ūtrū albumu planavoj īraksteit cytugod, a koncerta dzeivajā skaniejumā pīruodeja acim radzamu i ausim dzierdamu izaugsmi. Sovukuort „Green Novice” prīceja vēļ smoguokuys muzykys atbaļsteituojus, kai ari puorsteidze ar kvalitativi sagataveitim video akcentim.
Koncertu jau ap divim naktī nūslēdze vītejo Preiļu grupa „D-Light” – puiši nūspēlēja tik labi, ka publika vēļ nimoz nasataiseja īt da sātai, deļ tam vēļ leidz gondreiž četrim nu reita „Latgolys Radeja” pīduovoja muzyku nu audioīrokstim.
Tai Preiļūs paguo ituos vosorys leluokais latgalīšu muzykys koncerts, bet vēļ jiusim ir vareiba pagiut iz citim latgalīšu koncertim cytuos Latgolys vītuos. Papyldu zam „Taiseits Latgolā” zeimis nūtiks: 26.julī Dagdā latgaliski melodiskais vokors (pīsadaleis Inga i Normunds, „Rudiņs Steigys”, Laura Bicāne, „Angel” i Patrioti.LG), piec tam Rēzeknē 29.julī byus „Latgolys Radejis” nakts (pīsadaleis „Bez PVN”, Inga i Normunds, „Borowa MC” i „Likteneigais pagrīzīņs iz Vainovu”), 22.augustā Ludzys rajona Kuorsovā tiks reikuots jaunīšu muzykys koncerts, 1.septembrī Daugovpilī koncerts studentim, a 20.septembrī Bolvu rajona Upītē ikgadejais festivals „Upeitis Uobeļduorzs”, kurymā itūgod byus latgalīšu dzīsminīku jeb bardu saliduojums.Vairuok informacejis par latgalīšu muzykys svātkim i koncertim vysod variesit atrast škārsteikla lopā: www.madeinlatgola.lv
Kai jau tyka atzeimāts, ituos vosorys leluokais latgalīšu muzykys koncerts „Taiseits Latgolā” nabyutu nūtics, ka na Preiļu nūvoda dūmes atbolsta. Tai pat paļdis juosoka bīdreibai „Latgolys Studentu centrs”, kas ir golvonais koncerta iniciators. Paļdis – „Latgolys Producentu grupai” par leidzdaleibu koncerta organiziešonā.
Finansialu atbolstu snīdze:
Latgolys Regiona atteisteibys agentura, Vaļsts Kulturkapitala fonds, Daugavpiļs Universitate, Rēzeknis Augstškolai i Hipoteku banka (personeigs paļdis Preiļu filiāles vadeituojai Evģēnijai Leonovičai)
Paļdis informativajim draugim:
Latgolys regiona portalam Latgale.LV
Laikrokstam „Latgales Laiks” (i redaktorei Zigrīdai Somei personeigi)
Laikrokstam „Vietējā Latgales Avīze”
Latgalīšu kulturys gazetai aba škārsteikla portalam LaKuGa.LV
Portalam: munidraugi.lv
Vortalam studentnet.lv (i tuo puorstuovim Harijam Bernānam personeigi)
Latgalīšu muzykys radejai – Latgolys Radejai! (i direktoram Valdim Labinskim)
Kotrā Latgolys rajonā vysmoz pa vīna latgaliskam koncertam!
