Še, jem kreiteni i kruosoj poša

Še, jem kreiteni
I kruosoj poša
Sovu puorsoku boltū
Kaislys sorkonu
Voi tragiski bryuni-malnū.

***
Saplāstys e-posta viestulis.
Nu pasauļa baudys
Škir tikai rūteņu
Bikts krāsla sīneņa.
Hormoni tik un tai naguļ.
Tev napīteik!
Iz golda izplyuduse tiņte.
Jiurys zirdzenim
nūgrimušā kugī starp aļgem
nūteik meilesteiba.

Munys malenis
Tovs piļdejums.
I sadag sīneņa.

***
I tod, kod mes
Reali pasabučuosem,
Zuss pasauļam atstuotuo mola.
Nabyus vairs barjeris stoba
Ar nūsoukumu „man teve nav gona”.
I tod, kod tu byusi
Sajiems vysu akceju paketi munu
Es byušu tova.
A tu jussīs kai duraks
I ar tū man byus gona.

***
Guļu gultā,
Kurai bārbeju rozā gultasveļa.
Cenšūs nūkert sapynu pyrmū.
Īelpa, izelpa, īelpa
Spilvans smaržoj piec Teve.
Tovim gluostim, čikstim i mīra,
Naskaitamim rūžu i lilleju pušķim,
Nakstaureņu dejom i smaidim
Spilvans smaržoj piec vieja,
Kuram kruosa kai viežam.

***
Tiukstušim ilūzeju,
Utopiski skriejīni sīnā
Čaja vannys na tik kuojom
A ari dvieselei.

***
Mīsa vairs naalkst Tovys tuveibys.
Dvieselī sarupiejušu kuoju nūspīdumi
Smadzeņu garūzā viel vīna rīva.
Asi aizguojs.

***
Pa labi
Pa kreisi
Uz lyupom
Un pīris
Kryutim
Vādara
Viel zamuok…

***
Augstuokuo lobuma
Sentimentalys atminis
Salyktys puslitra burceņuos
I nūglobuotys pīlīkamā
Sapeliešonai.
Vuordūs spielejās laumenis
Aritmetiskys ilūzejis
Progresejā saplāsts reits
spielej ar nakts taurenim
Krustnagleņu šautrenis.
Ite tev pošam adateņa
skruopej iz muna auguma skudrenis.