Piļneibā nūdaguse īcīneituo autobraucieju āstuve “Dzelmes”
Šūnakt piļneibā nūdaguse īcīneituo autobraucieju āstuve iz Reigys-Daugavpils šosejis – Dzelmē. Guņsgrākā izpūsteits divstuovu ākys komplekss “Dzelmes” apmāram 1000 kvadrātmetru plateibā, kas pīder “Māris&Co”. Āku kompleksā atsaroda gon byuvmateriālu veikals, gon kafejneica.Šudiņ plkst.10.00 Zemgalis apgoboltīsys Aizkrauklis sesejā turpynuos skateit krimināllītu par kukuļjimšonu, par kū apsyudzāts bejušais Jākubpils cītuma prīkšnīka vītnīks Vladimirs Rubaņuks. Rubaņuks atsasacejs nu advokata Jura Broka pakolpuojumim, i turpmuok jū tīsā puorstuovēs advokats Dainis Lūsis, kurš paguojušuo goda novembrī lyudze tīsu atlikt lītys izskateišonu, kab varātu īpasazeits ar lītys materialim.
Šudiņ plkst.11.00 Valsts policejis koledžā reikuos atvārtū durovu dīnu Preiļu rajona Policejis puorvaldē. Tymā var pīzadaleitīs vydusškolāni, kai arī citi interesenti. Preiļu rajona Policejis puorvaldis darbinīki jaunīšus īpazeistynuos ar policejis dorba specifiku, paruodūt policejis telpys i dorba īspiejis policejis strukturā. Pasuokumā pīzadalāsīs Preiļu nūvoda dūmis prīkšsādātuojs Aldis Adamovičs .
Šudiņ plkst.13.00 Kruoslovys rajona padūmē četru bārnu vacuokim tiks izsnīgti Naturalizacejis puorvaldis (NP) lāmumi par jūs bārnu atzeišonu par Latvejis pylsūņim.
Turpynojūt pārn aizsuoktū dorbu, arī itūgod Tīseibsorga biroja eksperti kotru mienesi dūsīs konsultēt īdzeivuotuojus Latvejis reģionūs. Šūgod pyrmais reģionālais seminars šudiņ nūteik Bolvu pylsātys Kulturys i atpyutys centrā. Seminarā tiks atbildāts iz vaicuojumim par tū, kai i kur vērstīs ar syudzeibu, ja puorkuoptys cylvāktīseibys voi lobys puorvaldeibys princips. Paradzāts, ka peic seminara īdzeivuotuojim tiks snīgtys bezmoksys juridiskuos konsultacejis par cylvāktīseibu i lobys puorvaldeibys vaicuojumim.
