Papardis īleiguošona Bukmuižā

Bīdreiba “Latgolys Studentu centrs” ar Eipašūs aizdavumu ministrejis sabīdreibys integracejis lītuos sekretariata atbolstu realizej projektu „Latgolys jaunīši – Latgolys nuokūtne”. Ituo projekta ītvorā Bukmuižā (Ezernīku pogosts, Kruoslovys rajons) tyka sareikuots pasuokums „Latgalīts latgalīšam draugs”, kurymā varē puorsalīcynuot par Latgolys muzykalūs jaunīšu nu grupu „Bez PVN”, „Dabasu Durovys”, „Likteneigais pagrīzīņs iz Vainovu”, „Green Novice” i jaunuo literata Raibuo Suņa spiejom i talantu nest latgaliskū vuordu.

Kai koncerta puorsteigums beja, tai saceit, vītejūs muzykantu uzastuošona. Puiši nu kaimiņu (Kaunatys) pogosta i puors Bukmuižys meitinis kūpā saspielieja treis dzīsmes, vīna nu tom ari latgaliski – Werona Martina “Dabasi Raud”.

Tai kai sabraukuši beja pulka muzykantu, tod koncerts ilga vasalys divejis stuņdis. Pa itaidu laiku tūmār viejainajā laikā daži paspē nūsaļt, deļ tam dreižinki vajadzē tikt pi syltuo guņkura, kas ari operativi tyka sakurynuots.

Gūdeigi sokūt, ļaužu pi azara, kur beja paradzāts turpynuot ar “Papardis īleiguošonu”, beja až puoruok daudz, deļ tam suokumā nabeja tik vīglai tikt pi kūpeiga plana eistynuošonys. Tak tys jau ari nabeja nikaids breinums – vysim griebiejuos puorrunuot, ols izdzert, sīra nūgaršuot voi ar laivu pasavyzynuot…

Kai tymsa atguo, tai i ļauds jau ap guņkuri aizvin vairuok sazapuļceja i tod jau dzīsmes suoce skandynuot da reita gaismai i leidz pošai saulei. Pa nakts malnumu vēļ pagivem ar lāpom nūvest drusku gaismys ari iz tyvuokū solu i pussolu, kur tyka ari īkurynuots pa guņkuram – tei jau taida kai tradiceja Bukmuižā – bucys dadzynuošonys vītā.

A nu reita, saulis sagaidejuši, daži vēļ izamaudova teirajā i, kai soka, veseleigajā reita iudinī. Nu a tod jau beja juopagiust atrast kaidu breivu vītu iz svaigi savastuo sīna, voi teltī, voi ustobā iz krāsla…

Itai myusim guoja 22.junī Bukmuižā. Iz sazatikšonu cytugod!