Nasliepsim sovu susātivi pakrieslī

Mekleju sevi nu jauna.
Juosamaina leidzi laikam i cylvākim, tuopat ari juosavuica nu cytu klaidom, pošam vysys izdariet ir par moz laika, nu i naudys. Soka, ka vysleluokuo vintuleiba ir pylsātos, kur vysvaira ļaužu…
Bet es asu optimists. Lai gon soka, ka optimisti ir slikti informeiti pesimisti…

Jau kuodu laiku dzeivoju 14.kambarī. Man cīši garšoj buļvi, (buļbis, guļbis – kuo nu kurā molā sauc), man ir pasalaimiejīs par tū, ka piec jūs nav tuoļi juoīt- aiz pakša ir tiergs.

Tiergā nūteik vysa rūseiba i serialu cīneigys ainys. Suokūt ar „spircik, vodka, sigaretki”, beidzūt ar častušku dzīduošonu i akordiona spieļošonu. Nu gondreiži kuo vacuos krīvu kinuos.
Cilvāki Lītovā ar nikū daudzi nācasšķir nu ļaudim Latvejā. Kotram sovi dorbi i nadorbi, myužeiguo skrīšona i bīži vin kuo i pi myusu mīļuošonys vītā tikai mīļuošonuos.

Iz tiregu kotru dīnu īt vins veirīts nu voj kuo pi jim soka- vyras. Nazynu voj jis ir nūsaukts par Ignatu, Donatu, Simonu voj veļ kuodā lītavīšu vuordā. Bet Man līkās, ka jam pīstuoveitu Vitolds.
Jis kotru reitu īt iz tiergu, pierkt sviežu pīnu.

Nā, Vitoldam nav 20 kaču, pat tys pīns ni vysai ari garšoj…
Jis navar sagaideit, kod otkon Jū satiks-
Boltā skustenī ar ružavim duobulenim…

Tuodūs nivins vaira nastaigoj, bet jai pīstuov.
Vīgla pierstu sasatikšona kotru raizi prīcynoj Vitolda prostū sirdi…
Kotru reitu ap devenim jam napītiek drūsmis
Sovai meilajam pīna puordeviejai pasceit nikū vaira
Kuo man lyudzu otkon pus litra pīna…

Varbyut, kas kuodu raizi maineisīs, ar varbyut ari nā. Navāga beitīs kū izdareit na tuo, tys nav tik brīsmeigai kuo naizdareit nikuo. Vysam sovs laiks, bet cytu raizi ir suopeigi saprast, ka kū variieji izdareit jau daudzi mudruok…

Veļ ir tuoda babeņa, lītaviski – senele. Jei kotru reitu ar vāzdu puordauza dzeivžūga kryumeņu garū ryndu. Izaver jūkainai. Naseņ vin saprotu, ka jei tuo meklej, kurā vītā nūlykuse kaču bļūdu. Kačim teik lobuma, labi, ka ir tuodys babys

Brrr….Palīk solts, einu atpakaļ sovā kambarī.
Vuj, aizmiersu pasceit, ka kambars lītuviski nūzeimoj ustoba!!! 😀
Nav nūslāpums, ka latgalīšu i lītavīšu volūdys ir radineicys. Bet cytu raizi goduos, ka volūda myus pošus cīši izjūkoj. Bet man pateik smītīs i es smajūs.

Naz par kū cylvāki tik daudzi slymoj. Smīkli ir vyslobuokuos zuolys. I kotra mīlesteiba ir kuo atdzimšona…
Acss pošys kreit cīt… Acagulstu iz luovys…

Jau reits. Aiz lūga bārni skrīn da sovys muoceiklys, nanūvāluot stuņdis. Cytaidi muoceituojis atkoņ byus pyktys.
Ari myusu diesteituojom napateik, ka mes kavejam. Čyup kotru minotu, lai īdiesteitu myusim jaunys zynuošonys. Kas tū byutu padūmovs, ka augstškolys pasnīdziejus varātu nūsaukt par diesteituojim.

Kotru reitu iz sovu dorba vītu ar lelu uodys sumku i malnim kūrmuļa zuobokim īt cierpieja. Piec tuo, cik Viļņā ir cierpeiklu, varātu dūmuot, ka vysi staigoj plykom golvom. Bet tuo nav.
Viļņā tuopat kuo Reigā, var maneit iz īlys stuovom pa kuodai aitai. Bet bez tuo naiztikt, kotram sova vīta i vierteiba… Pīmāruotu nūsaukumu izavieliejuš vīglys uzvedeibys sīvīšu apzeimeišonai. Nikuo vaira kuo pīvilceiga uorīne vuškā nav.

Sakluoju ryupeigi sovu luovu, navar tak atstuot nakuorteigu. Luova lītavīšu mielī ir gulta.
Ļaužu ir daudzi i vysaidu. Vysus nikod nav īspiejams saprast i navajag.

Šūvkor mīga pelis par mani ir aizmiersuš. Nu i lai.
Bosom kuojom izkuopu iz soltuo balkona betona. Nikas nav mainejīs, koč i ari nazynu kuo beja da šam.
Zam maņa guļ pylsāta. Laternys, buoli dzaltonys kuo zyvu vādari, gar malnū asfalta upi nūsabeiduš veļ triseļej…

Nav svareigi voj tys ir zeimuļs, padūms voj vinkuorši smaids, bet vysi cylvāki, kū mes sateikam dūd myus kū lobu.
I varbyut pyrma kuopt liektuvī i liekt iz kuodu cytu zemi vāga cīši padūmuot voi vierts. Vysys problemis suokās nu tuo, ka grybam byut tuodi, kuodi pareiseibā naasam i grybam byut tī, kur myusu nimoz navajag.

Kotru dīnu,
Veļūt sovys smoguos dūmys nu kolna,
Giunu jaunu, skaistu pasauļa mīļuošonu.
Pasauļs nav lobs, nā ni pavysam…
Bet juomīļoj ari švokais,
Lai tod, kod jis atītu da maņa,
Jis palyktu lobs.
Vysi, kurus pa eistam mīļoj
Raizi paļīk lobi…

I golu golā, zam zemu vysi byusim vīnuodi. Par tū vinolga kur, Lītovā voj Latgolā nasabeisim byut sovaiduoki!
Prīceigus svātkus!;)