Myusu vaļstī latgalīts mozvierteiguoks par čyguonu
Lītovīšu školys puorstuove atzeimej: “Byuteibā asom gondreiž porosta videjuos izgleiteibys īstuode, deļ tam ka vysy vuiceibu stuņdis pi myusu nūteik latvīšu volūdā. Atsaškiram tikai ar tū, ka myusim ir lītovīšu volūdys i literaturys stuņdis. Pamatškolys vacuma bārnim atseviškys stuņdisi, pīvadumam, dorbmuoceiba i zeimiešona, tiek pasnāgti lītovīšu volūdā”.Juoatzeimej, ka itaidā školā vuicās kai lītovīšu, tai latvīšu i cytu tauteibu bārni i nivīnam nav nikaidu lelu pretenziju, par īspieji īsavuiceit vēļ vīnu volūdu.
Latvejā ir 146 mozuokumtauteibu školys i 89 divplūsmu školys (suplok eistynoj izgleiteibys programmys latvīšu i mozuokumtauteibu volūdā, pīvadumam, školā ir kai latvīšu, tai i krīvu plūsmys klasis) i teik eistynuotys izgleiteibys programys ostoņuos mozuokumtauteibu volūduos: lītovīšu, igauņu, krīvu, poļaku, ukraiņu, boltkrīvu, ebreju i čiguonu (romu). Piec IZM datim, paguojušajā vuiceibu godā mozuokumtauteibu izgleiteibys programuos vuicejās 69 850 školānu, kas ir apmāram 26 procenti nu kūpejuo školānu skaita vaļstī. Statistika līcynoj, ka leluokuo daļa mozuokumtauteibu školu absolventu īzastuoj augstškoluos.
Mozuokumtauteibu izgleiteibys programuos školāni papyldu pamatizgleiteibys i videjuos izgleiteibys standartim apgiust mozuokumtauteibys volūdu, viesturi, kulturu i tradicejis. Pamatškoluos teik eistynuoti četri dažaidi modeli, ar dažaidu latvīšu volūdys i mozuokumtauteibys volūdu lītuojuma attīceibu. Ir taids modeļs, kura ītvorā školāni, jau suocūt ar pyrmū klasi leidz caturtai klasei praktiski vuicās tikai sovā dzymtajā volūdā i, tikai suocūt nu 5. klasis, latvīšu i mozuokumtauteibys volūdā.
Mozuokumtauteibu školys vysavaira izavielej tūs modeļus, kuri pasūla proporcionalu volūdu apgivi. Visi modeli paradz, ka 9.klasē školāni vuiceibys apgiust pamatā latviski.
Latgalīši nav mozuokumtauteiba, tak vysleidz inceresnai ir papieteit seikuok itūs školu darbeibu i varbyut Latgolys školuos ir juoprosa deļ latgalīšu volūdys i kuļturys vysmoz tik pat daudz laika i resursu, kai tys teik veļteits lītovīšim, poļakim… Leluokuo problema, ka myusim nav vaļsts, kam papraseit paleiga. Koč uoatzeimej, ka ari čyguonim (romim) nav cytys vaļsts kai tik Latveja, kam koč kū vaicuot.
Izmontuoti materiali nu laikroksta “Latvijas Avīze” 6.oktobra numura
