„Muzykys Skrytuļs” byus 2009. godā

Itymā godā nateik reikuots latgalīšu jaunuos muzykys festivals „Muzykys Skrytuļs”, kas jau trejus godus piec kuortys beja audzs i atsateistejs Daugavpiļs rajona Leiksnys pogostā. Teik kruoti spāki, idejis i resursi, kab cytugod festivals varātum otkon kliut par svareiguokū latgalīšu muzykys goda pasuokumu.

Lai itei vosora nabyutu patukša, tod bīdreiba „Latgolys Studentu centrs” reikoj vairuokus koncertus ar latgalīšu muzykantu daleibu – tai kotrā Latgolys rajonā teik planavuots vysmoz vīns pasuokums ar devizi „Taiseits Latgolā”. Kai pyrmais i leluokais izskaneis 19.julī Preiļu parka estrādī gaidamais lelkoncerts, kurymā pīsadaleis „Laimas Muzykanti”, „Bez PVN”, „Dabasu Durovys”, „D-Light”, „Weron Martin”, „Green Novice”, „Likteneigais pagrīzīņs iz Vainovu” i legendaruo Latgolys grupa „Elpa”. Itais koncerts teik reikuots ar lelu Preiļu nūvoda dūmes atbolstu, finansiali paleidz Latgolys Kulturys programma (Latgolys regiona atteisteibys agentura i Kulturkapitala fonds), Daugavpiļs Universitate, Rēzeknis Augstškola i Hipoteku banka. Skateituojim daleiba bez moksys.

Papyldu zam „Taiseits Latgolā” zeimis nūtiks: 26.julī Dagdā latgaliski melodiskais vokors, Rēzeknē 29.julī „Latgolys Radejis” nakts, 22.augustā Ludzys rajona Kuorsovā tiks reikuots jaunīšu muzykys koncerts, 20.septembrī Bolvu rajona Upītē ikgadejais festivals „Upeitis Uobeļduorzs”.

Vairuok informacejis par latgalīšu muzykys svātkim vysod variesit atrast škārsteiklā: www.madeinlatgola.lv