Muoklseigam smaidam, muoksleigys kruosys i muoksleiga jāga
Nikur tuoļuok par smaidu i smaideišonu naasu tykuse, deļ tuo pīduovoju paskaitiet veļ kuodu smaideigu aileiti. A varbyut pasmaideisi? 🙂
***
naz kur īsarokūs sovuos dūmuos
i suoku cyluot vacūs rokstus
jū ir daudz pavysam daudz
i dūmu ir cīši daudz
šķiroju juos peic dereiguma
bet sajiuk oktkon vyss vīnā smaidā
nakuorteiba munā golvā
itūraiz naleidzeis slūta i iudiņa spaņs
Tu izguoji uorā – solts
smaideigai dīnai lely zūbi
suņs pagolmā raj
taņta izvadus gūvi
tu otkon nu maņa aj
īt jau Tu dreiksti
koč kotru dīnu
jū zynu ka mani
napamessi vīnu
Napīteik ar smaidu
Sasatrokovuš vuordi izalieja uorā,
Applyudynuodami zaļuo vokora klusumu,
Spīžu sovus sirds zeimūdzeņus
Iz papeira lopys, tik aizmiersu nūpierkt marku.
Dialogs
Nūsaglobavus aiz mežrūzeišu kryuma
Runoju ar streipainū runci
Jis maņi saprūt
Pa laikam damīdz ar aci i smaida
I es jam pasmaideišu pretim
Latgolai
Smaideigā bolsā dzīžu sovu dzīsmi,
Najau par mistiskom sapņu solom,
Najau par čudnom kolnu olom-
Par sovu zemi, par sovu sauli.
kod žāl smaida
ar trejim sūļim var dameit sauli
ar divim mienesi
man pītyktu ar muotis mīlesteibu
ka jei byutu
Svātki
Šudiņ čudna dīna- ustobā svātki.
Krāsli izlykuši zylus šļipstus izaverās cīši glauni.
Izķemmeitom uzacim i ūsom
Ananass grūzuos mandarinu puļceņā,
Kod vokorā daļic ausi tyvuok,
Var dzierdeit kuo jī smejās.
A, ka veļ tuo cīši īsaver
I musurnīki ir smaideigi
Smaida i vyss,
I jūs garī daguni vaira naizaver tik naskaisti… 🙂
Kūpeigs pīdzīduojums
Tu rakstieji dzeju par zilim kolnim,
Bet es par jiurom zylom.
Tu dzīduoji dzīsmi par vāsom naktim,
Bet es par reitim vāsim.
Voi Tu siedi zylā kolnā, voi zylā jiurā brīn,
Voi vāsuos naktīs dzīdi, voi pa rosu skrīn-
Tu byusi muna laimys atsliedzeņa, atsliedzeņa,
Kuo mozam bārnam gaiša pasaceņa, pasaceņa.
Tu rakstieji stuostus par zilim muokulim,
Bet es par azarim zilim.
Tu spielieji dzīsmis par vāsom dīnom,
Bet es par vokorim vāsim.
Voi Tu siedi zylā kolnā, voi zylā jiurā brīn,
Voi vāsuos naktīs dzīdi, voi pa rosu skrīn,
Tu byusi muna laimis atsliedzeņa, atsliedzeņa,
Kuo mozam bārnam gaiša pasaceņa, pasaceņa.