Ministri brauc iz Latgolu

Gatavejūtīs Vyspuorejīm latvīšu dzīsmu i deju svātkim, šudiņ Viļānu kulturys nomā nūtiks vydusskūlu doncuotuoju kolektivu sadancss “Lustes dienas”. Plkst.15 deju kolektivim paradzāts mieginuojums, bet plkst.18.00 interesenti teik aicynuoti iz vydusskūlu doncuotuoju kolektivu koncertu. Koncertā pīzadaleisīs Lūznovys profesionaluos vydusskūlys, Nautrānu vydusskūlys, Kaunatys vydusskūlys, Dricānu vydusskūlys, Varakļānu vydusskūlys, Rāzeknis profesionaluos vydusskūlys kolektivi, kai arī Rāzeknis Vaļsts ģimnazejis kolektivi “Vadži” i “Skoli” i Viļānu doncuotuoju kolektivs “Ritvari”. “Lustes dienas” organizej rajona skūlu doncuotuoju kolekiīvu viersvadeituoja. Pasuokumu atbolsta Rāzeknis rajona padūme.

Šudiņ dorba vizitē Jākubpilī īzarasīs satiksmis ministrs Ainārs Šlesers (LPP/LC). Jākubpilī satiksmis ministrs apmeklies AS “Latgales ceļi”, tiksīs ar dūmis specialistim, apmeklies Jākubpils rajona padūmi, tiksīs ar pogostu vadeituojim, kai arī īsapazeis ar vairuokim piļsātys objektim, tūs vydā ari ar logistikys centra projektu.

Šudiņ plkst.20.00 Davgavpilī, Latvīšu kulturys centrā, Starptautiskuo masku tradiceju festivala ītvorūs nūtiks folklorys kūpys “Svātra” pyrmuo albuma “Lobreiteņ, reitā agri…” prezentaceja. “Svātra” tulkojumā nu latgalīšu volūdys nozeimej nūjauta i nūjausma. Jaunuo albuma dzīsmēs skaņ “Svātrys” nūjauta par senču dzeivi i tradicejom. Latgalīšu tautys dzīsmu skaniejumu pavoda latvīšu tradicionalī muzykys instrumenti: kūklis, vijūlis, stabulis i bungys. Albums taps ar Davgavpils dūmis Kulturys puorvaļdis i bīdreibys “Dīnvidlatgolys pošvaldeibu vīceibu centrs” atbolstu.

Davgavpilī šudiņ turpinojās VII Masku tradīceju festivals. Plkst.12.00 Krīvu nomā nūtiks spūku stuostu teicieju i izpildeituoju, konkurss-koncerts, plkst.15.00 Latvīšu kulturys centra koncertzalā suoksīs gostu kolektivu maskuošonys tradiceju uzvadumu-ritualu konkurss, bet plkst.18.00 paradzāta festivala atkluošonys rituāls i Davgavpils muokslys vydusskūlys “Saulys skūla” Natradicionaluos mūdis skate. Divys stuņdis vāluok gaidoma folklorys draugu kūpys “Svātra” pyrmuo albuma “Lobreiteņ, reitā agri…” prīkšāstuodeišona.

Šudiņ plkst.10.10 izgleiteibys i zynuotnis ministre Tatjana Koķe (ZZS) vadeis vuiceibu stuņdi Viļānu vydusskūlys 12.klašu skūlānim. Kai ziņuots, ituos nedelis laikā vairuok nakai 50 Latvejis līderi dūdās iz skūlom, lai iz vīnu stuņdi kliutu par skūluotuojim i tuodejaidi aicynuotu arī jaunīšus struoduot itymā profesejā. Byudama angļu volūdys filologe i pedagogejis zynuotņu habiliteita doktore, izmontojūt interaktivys vuiceibu metodis, Koķe stuņdi vadeis angliski, par temu “Vuiceit, vuiceitīs”. Lai vyspuseiguok īpazeitu sovus nuokamūs skūlānus, pyrms vuiceibu stuņdis Koķe īplānuojuse tikšonūs ar Viļānu vydusskūlys direktoru Pēteri Tretjuku i skūluotuojim. Savukuort plkst.13.00 ministre laseis referatu “Latvejis sabīdreiba i izgleiteiba: kūpeigī izaicynuojumi” Rēzeknis augstskūlys reikuotajā starptautiskajā zynuotniskajā konferencē “Sabīdreiba, integraceja, izgleiteiba”, kas nūtiks piļsātys dūmē.

Šudiņ i reit, Rēzeknis augstskūlys (RA) Pedagogejis fakultatis Personeibys socializacejis pietiejumu instituts reikoj starptautiskū zynuotniskū konferenci “Sabīdreiba. Integraceja. Izgleiteiba.’ ‘Konferencis svineiguo atkluošona nūtiks Rēzeknis dūmis konferenču zalā plkst.12.30.

Šudiņ Rēzeknis dūmis kuortejā siedē planuots lemt par pasažiru puorvoduojumu zaudiejumu kompenseišonu. Rēzeknis dūmis siedis dorba kuorteibā īkļauti arī vaicuojumi par Rēzeknis Vokora vydusskūlys, Rēzeknis 3.vydusskūlys, Rēzeknis Pūļu vydusskūlys nūlykumu apstyprynuošonu, vīnreizejuo pabolsta daškieršonu uorkuortys situacejis rysynuošonai, par pyrmpierkuma tīseibom iz nakustamū eipašumu Rēzeknī i.c. vaicuojumi.