Leivuonūs uzjiemiejus informies par projekta dasacejumu sagatavuošonu
![](https://lpr.gov.lv/wp-content/uploads/2005/dezuratteli/79.jpg)
Pīnsaimnīku protesta akceja, dolūt pīnu reidzinīkim, īdūmuota 30.majā plkst.16 Reigā, Doma laukumā. Šudiņ akcejas organizatori paziņūs arī zīdojumu telefona numeri i bankas konta numeri i lyugs sabīdreibu atbalsteit protesta akcejas finansiešonu. “Protesta akceju raudziesim izveidūt atmiņā palīkūšu, kab sabīdreiba tū atminātūs pyrma cytom Saeimas vieliešonuom, kab, izavālūt, par ko bolsūt, zinuotu, ka nadreikst nūdūt sovejūs bolsus par tuom partejom, kuruom naryup sovejuos tautys atīsme,” tai sacīja Valmīras rajona lauksaimnīku organizacejas vadeituoja i protesta akcejas iniciatore Dace Pastare.
Valsts guņsdzieseibas i gluobšonys dīnests, kab puorbaudeitu trauksmis sirenu tehniskū gataveibu i skaņis signala dzierdameibu, šudiņ plkst.11 iz trejom minutom vysā Latvejā īslāgs trauksmis sirenas. Trauksmis sirenu gataveibas puorbaude teik veikta divejis reizis godā. Itamā dīnā dzeivuotuojim nav pamota sazatraukt i nikaida tuoļuokuo reiceiba nav vajadzeiga. Trauksmis sirenas paradzātas dzeivūtuoju uotrai breidinuošonai par uorkuortejom situacejom, nūtikušom dobys voi tehnogenom katastrofom ci tū draudim.
Šudiņ Riezeknē, Latgolas Kulturviesturis muzeja Izstuožu zālī plkst.15 tiks atkluotas fotografeju i bārnu zeimejumu konkursa dorbu izstuodis, kai arī tiks paziņūti i apbolvūti konkursu īveicieji. Zeimejumu izstuode “Rēzekne – pilsēta Latgales sirdī” i fotografeju konkursa dorbus par temu “Rēzekne – Latgales kultūras un izglītības pilsēta” varies apsaviert da 14.juņam.