Leidz 15. augustam Aglyunā Dīvmuotis svātku laikā nūteik arī IV Latvejis Jaunīšu dīnys

Nu sudiņdīnys leidz 15. augustam Aglyunā Dīvmuotis svātku laikā nūteik arī IV Latvejis Jaunīšu dīnys. Jaunīšu dīnys teik plānuotys kai alternatīvs pasuokums XXIII Pasaulis Jaunīšu dīnom Sidnejā. Jaunīšu dīnom byus ekumenisks raksturs, iz tom aicynuoti ni tikai katūļu jaunīši, tuos ir atvārtys arī cytom konfesejom i visim interesentim.

Vaļsts policejis darbinīki Vyssvātuokuos Jaunovys marejis dabasūs uzjimšonys svātku nūrisis laikā Aglyunā struoduos pastyprynuotā režimā. Kab guoduotu par vairuoku dasmytu tyukstušu daleibnīku drūšeibu i sabīdriskū kuorteibu, nu šudiņdīnys leidz 15. augustam svātku nūrisis vītā struoduos gon Preiļu, gon apkuortejūs rajonu policejis puorvaļžu darbinīki.

Vakar i šudiņ Rēzeknis rajonā gastej filmiešonuos grupa nu Briselis, kas uzjam videofilmu par pūdnīkim, pūdnīceibys omotu i tuo nūzeimi ilgtspiejeiga tūrisma atteisteibā, tai informej Rēzeknis rajona padūmis sabīdriskūs attīceibu specialiste Laura Ieviņa. Gasteišonys laikā jī īsapazeist arī ar šmukuokajim Rēzeknis rajona i pylsātys objektim.

Rēzeknē, Latgolys Kultūrviesturis muzejā Izstuožu nomā, šudiņ plkst. 14 tiks atkluota muokslinīka Pītera Džigura grafikys i glaznu izstuode “Skūpsts zemei”, informej LKM sabīdriskūs vaicuojumu i reklamys specialiste Vineta Upe. Izstuodē byus skotami 36 grafikys, eļļys i akvareļtehnikā veikti muokslinīka dorbi.