Latgolys Radejis zinis (9.09.2008.)
Saimys prīkšsādātuojs Gundars Daudze (ZZS) šudiņ dūdās dorba vizitē iz Bolvu rajonu. Gasteišonys laikā G.Daudze tiksīs ar rajona pošvaļdeibu i īstuožu vadeituojim, kab puorrunuotu aktualitatis, kas skar Latvejis dzeivuotuojus pīrūbežā i lauku rajonūs, i diskutātu par politiskū situaceju vaļstī.Par Goda sīvīti Rēzeknē atzeita SIA “Accounting Latvia” vadeituoja Ilona Markunaite. Konkurasam Rēzeknis dzeivuotuoji īsyutie kūpumā treispadsmit anketys, pīsokūt tuos riezeknītis, kurys ar sovu dorbu, attīksmi pret leidzcylvākim ir spiejušys aizkustynuot, ruodūt pīmāru i drūsmeigu dzeivis poziceju. Pošlaik I.Markunaites vadeitais uzjāmums paplašynoj sovu darbeibu – turpynojās jaunu filiaļu atvieršona uorpus Rēzeknis piļsātys.
Latgolys apgoboltīsa šudiņ planavoj turpynuot tiemēt kriminallītu, kuramā par kukuļjimšonu apsyudzāts Vaļsts tehniskuos uzraudzeibys aģenturys Daugavpils regionaluos dalis vacuokais inspektors Māris Šaršūns. Da šam tīsa nūpratynuojuse gon līcinīkus, gon apsyudzātū.
10.septembrī 15 stuņdēs Daugavpils rajona Ilūkstes Kulturys centrā Latgolys planuošonys reģiona sadarbeibys komisejis sēdē planuots apsprīst problemys i īspiejamūs rysynuojumus pasažiru puorvoduojumu vaicuojumā, vairuokys pašvaļdeibys Latgolā ir naapmīrynuotys ar Satiksmes ministrejis Autotransporta direkcejis lāmumu, kas paredz nu 15.septembra slēgt daļu sabīdriskuo transporta autobusu reisu. Pašvaļdeibu vadeituoji uzskota, ka, slādzūt autobusu reisus, teik stypri paslyktynuotys īdzeivuotuoju puorsavītuošonys īspiejis iz izgleiteibys, veseleibys i cytom īstuodem.
