Latgolys Radejis zinis (9.05.2008.)

Šudiņ Preiļu nūvoda kulturys nomā nūtiks pasuokums Preiļu nūvoda leluokajim nūdūkļu moksuotuojim. Iz svineigū vokoru ir uzaicynuoti 35 uzjāmumi i īstuodis, kuruos 2007. godā nūdūkļūs ir īmoksuojušys vysleluokuos summys. Sovukuort četrūs Preiļu 1. pamatškolys zālē nūtiks lobuokūs Preiļu nūvoda sportistu apbolvuošona. Par augstim sasnīgumim čempionatūs i meistarsaceikstēs ar naudys bolvom (leidz 90 latim) tiks apbolvuoti septeni vīglatlēti, pīci golda tenisisti, diveji futbolisti, pīci džudisti, kai arī divej iudiņasliepuošonys, četri sporta deju sacenseibu dalinīki. Naudys bolvys 40 latu apmārā kotrs sajims arī 17 treneri i sporta školuotuoji.

Šudiņ Rēzeknis Augstškolā (RA) nūteik ikgadejais orientiešonuos pasuokums “Kruoka 2008”. Itūgod pasuokuma tēma ir “Studentiskī pirāti”, tai informej RA Sabīdriskū attīceibu nūdaļā. Pasuokuma mierķis ir vīnkūpus sapulcynuot Latvejis augstuokūs vuiceibu īstuožu studentu puorstuovjus i izveiduot ar konkursim i atrakcejom boguotu pasuokumu.

Šudiņ, Eiropys dīnā, Rēzeknis jaunīšu centrā “Jacis” nūtiks interaktiva piecpušdīne “Mēs”. Jaunīši tiks īsaisteiti testūs, veiduos kolažys, pīsadaleis polemikā par tolerancis, pylsūneibys i etniskuos integracejis vaicuojumim.

Ar ceļuojumu, puorsoku i cepelinu dīnu Jākubpilī nūsaslēgs Lītovīšu kulturys nedeļa “Sveika, Lītova!”. Pīcūs Jākubpils viesturis muzeja Breivdobys nūdaļā suoksīs ceļuojumu, puorsoku i cepelīnu piecpušdine. Tiks stuosteits vaira par Lītovys īvāruojamuokajim apskatis objektim, kai arī klietī sveču gaismā tiks skaiteitys lītovīšu puorsokys, taiseiti i āsti cepelini, bet septeņūs Krustpils kulturys nomā ar lītovīšu i latvīšu sadraudzeibys koncertu nūsaslēgs lītovīšu kultūrys nedeļa Jākubpilī.

Šudiņ Kruoslovā i Davgavpilī nūtiks Ūtruo pasaulis kara upuru pīmiņys dīnys pasuokumi. Šudiņ Kruoslovā plkst.10.00 pylsātys parkā pi krytušūs karaveiru memoriala suoksīs uzvarys Ūtrymā pasaulis karā 63.godadīnai veļteitais mīteņš. Piec tam paradzāts svineigs pasuokums, kurā kara veterani pīminēs krytušūs ceiņu bīdrus. Arī Daugavpilī šudiņdīna tiks svineita, pīmiņis vītuos tiks nūlyktys pučis, bet pasuokumi nūzasļāgs plkst.12.00 Bruoļu kopūs. Dubrovina parkā tiks īdagta myužeiguo guņs.