Latgolys Radejis zinis (6.06.2008.)
![](https://lpr.gov.lv/wp-content/uploads/2005/dezuratteli/79.jpg)
Rēzeknis pylsātys kulturys nomā šudiņ plkst.17.00 jau 7.raizi nūtiks mozūs doncuotuoju festivals “Dzigucs 2008”. Nu 2001.goda itū festivalu reikoj Rēzeknis pylsātys kulturys noma rodūšais kolektivs i bārnu deju kolektivs “Dziguči”. Kai eipašī gosti festivalā daleibu jims krīvu tautys deju kolektivs “Ručejok” (vadeituoja Tatjana Patmalniece) i Rēzeknis Pūļu vydsškolys bārnu deju kolektivs (vadeituoja Malgožata Vienglovska). Festivalu kuplynuos 2008.goda tradicionaluos muziceišonys konkursa “Klaberjakte” laureati – titula “Zalta muzykants” īgivieji – Rēzeknis pylsātys kulturys noma folklorys kūpa “Vīteri” (vadeituoja Sandra Stare).
Šudiņ Kruoslovys pylsātys svātkūs, kas turpynuosīs leidz 8.juņam, nūteik Gostu dīna. Šudiņ septeņuos stuņdēs vokorā breivdobys estradē suoksīs koncerts ar gostkolektivu pīsadaļeišonu nu Piedrujis, Kalnīšu, Kaplavys i Ūdreišu pogosta, bet nadaudz vieļuok, ostoņuos stuņdēs – ansambļa “Eolika” i Olgys Rajeckys koncerts.
Nu šudinis leidz 8.juņam Daugavpilī nūtiks pylsātys 733.dzimšonys dīnai veļteitī svātku pasuokumi. Šudiņ vīnūs dīnā Berkenelē suoksīs sadraudzeibys pylsātu forums. Pylsātys svātku dīnuos nu plkst.9 leidz 17.00 Daugavpils dūmis telpuos byus apsaverama potografeju izstuode “Davgavpils cītūkšņam 130”. Plkst.19.00 pylsātys muzeja pogolmā suoksīs grupys “Movements” koncerts. Šudiņ i reit nu plkst.11 leidz 18 Daugavpils muzejā byus atvārtūs durovu dīna i byus apskotama Daugavpils regiona Muokslinīku asociacejis daleibnīku dorbu izstuode “Muokslys dīnys’2008”.
Šudiņ pylsātys svātku prīkšvokorā Jākubpilī, Krustpils pilī, nūtiks tradicionaluo konfereņce “Jākubpiļs kulturys zeimis”. Konfereņce teik reikuota ar mierki izgleituot pylsātnīkus par Jākubpiļs viesturi, par lītom, ar kū pylsāta i tuos īdzeivuotuoji var lapuotīs. Pasuokumu atkluos pylsātys pošvaldeibys prīšksādātuojs Leonīds Salcevičs. Peic tam ar lekciju “Robežupe Daugava” uzastuos bīdreibys “Daugovys Savīneiba” vaļdys lūceklis Dainis Īvāns.
Šudiņ Malnovys koledžys sporta bāzē nūtiks Ludzys rajona pošvaldeibu 2008.goda sporta dīna “Malnova -2008”.
Šudiņ Daugavpilī, Leluo Strūpu azara pludmalē i pludmalē “Strūpu viļņs” svineigi tiks pacalts Zylīs karūgs. Paldvītu kvalitatis sertifikatu pasnīgšona suoksīs divpadsmitūs dīnā ar Nacionalūs paldvītu kvalitatis sertifikata pasnīgšonu pludmalei “Ruģeļi”. Plkst.12.40 Zyluo karūga sertifikata izsnīgšona i karūga paceļšona paradzāta pošvaldeibys pludmalē Leluo Strūpu azara krostā, bet plkst.13.20 – pludmalē “Strūpu viļņs”.
Šudiņ vīnpadsmit stuņdēs Preiļu rajona tīsa skateis SIA “Lettglas” moksuotnaspiejis lītu. Kai atzyna uzjāmuma administrators Arnolds Vende, jis saskota vairuokys moksuotnaspiejis pazeimis: nav izmoksuotys olgys darbinīkim, nav nūmoksuoti nūdūkli, bet uzjāmuma poruodsaisteibys ir vairuok nakai miļjons latu. “Uzjāmuma poruodi ir miļzeigi. Voi īspiejama uzjāmuma sanaceja? Izstaiguoju āku, i juosoka, izaverās drausmeigi – vyss izvuokts,” tai ar nūžālu soka A.Vende.
Latvejis Pediatru asociaceja (LPA) sadarbeibā ar Latvejis Bārnu muosu apvīneibu (LBMA) šudiņ Bolvūs organizej konfereņci “Aktualitātis pediatrejā”.