Latgolys Radejis zinis (4.03.2008.)
Šudiņ AS “Parex banka” apbolvuos labuokūs Rēzeknis slimineicys mediķus, kurus bankys bolvu sajimšonai izvirza slimineicys uorstu kolektivs. Svineigajā pasuokumā divejim Rēzeknis slimineicys uorstim tiks pasnīgti nominācejis aplīcynuojuma roksti, kai arī medikim pīškiertys naudy bolvys 200 latu apmārā.Šudiņ Daugavpils dūmis mozajā zalā nūtiks Daugavpils teritorejis planuojuma 2006.-2018. godam grūzejumu 1.redakcejis i Daugavpils atteisteibys programmys “Mana pils – Daugavpils” 2008.-2014. goda Vidis puorskota projektu sabīdriskuos apsprīšonys sanuoksme.
Preiļu nūvoda dūme nūlāmuse vierstīs Vaļsts kulturys pīminekļu aizsardzeibys inspekcejā ar lyugumu pīškiert kulturys pīminekļa statusu divejim Preiļu nūvoda dīvnomim. Kulturys pīminekļa statusa pīškieršonai teik izvirzeits Moskvinas Vacticeibnīku lyugšonu noms i Aizkalnis Vyssvātuokuos Dīvmuotis Aizmigšonys pareizticeigūs bazneica.
Šudiņ Rēzeknis dūmē nūtiks Latvejis Spieļu biznesa asociacejis reikuotuo diskuseja “Sociāli atbildīgs spēļu bizness Rēzeknē: šodien un rīt”. Da šam leidzeigys diskusejis nūtykušys Kuldīgā, Cēsīs, Jākubpilī i Daugavpilī. Latvejis spieļu biznesa asociacejis pārn aizsuoktuo regionāluo diskuseju cikla mierkis ir atrast krystpunktu, kur teikās ci varātu sasatikt sabīdreibys i spieļu biznesa interesis.
Šudiņ Jākubpils tautys noma konferenču zalā vītejuos pošvaļdeibys puorstuovji tiksīs ar Latvejis Geotelpiskuos informacejis agenturys puorstuovjim i puorrunuos projektus, kai ari ar augustā paradzātū starptautiskū konferenci saisteitūs jautuojumus.
