Latgolys Radejis zinis (31.07.2008.)
Rēzeknis rajona pošvaļdeibuos nūteik Nūdarbynuoteibys vaļsts agenturys organizātais aktivuos nūdarbynuoteibys pasuokums vosorys breivlaikā školānim nu 13 godu vacuma, kurī īgiust izgleiteibu vyspuorejuos, specialuos ci profesionaluos izgleiteibys īstuodēs. Treis vosorys mienešu laikā nūdarbysnuoti tiks 365 školāni. Projektā pīsadola 17 rajona pošvaļdeibys.Šudiņ Rēzeknis rajona, Griškānu pogostā, gostu sātā “Zaļuo sola” plkst.14 nūtiks XXIV Vyspuorējūs latvīšu Dzīsmu i XIV Deju svātku daleibnīku i jūs atbaļsteituoju gūdynuošonys pasuokums. Pateiceibys roksti tiks pasnīgti vairuok nakai 20 Rēzekns rajona kūru, deju kolektīvu, folklorys kūpu i ansambļu vadeituojim. Jīm tiks daškiertys arī Rēzeknis rajona padūmis naudys bolvys. Arī Jākubpilī teik sumynuoti rajona pošdarbeibys kolektivu vadeituoji, kulturys i izgleiteibys īstuožu vadeituoji, kas nūdrūšynova kolektivu daleibu Dzīsmu i deju svātkūs.
Šudiņ Rēzeknē Eiropys Tautu festivala laikā nūtiks IV starptautiskais Nacionalūs kulturu festivala koncerts “Nu sovys tautys nuoc…”. Nacionalūs kulturu festivals nūteik nu 2000.goda ik peic divim godim, tys snīdz īspieju īsapazeit ar etniskajom kulturom, prīcuotīs par tautu kostimim i baudeit melodejis i aizraujūšus deju sūļus.
