Latgolys Radejis zinis (30.04.2008.)
![](https://lpr.gov.lv/wp-content/uploads/2005/dezuratteli/79.jpg)
Rēzeknis Augstskūlys studentu teatris „ĶerRA” šudiņ jau sastū godu piec kuortys organizej veiklūs improvizatuoju sacenseibys “Čeikst skatuvis dieli”. Pasuokuma mierkis ir puļcēt aktivus i radūšus skūlānus i studentus iz īprīšk nasagatavuotim akterspēlis demonstriejumim. Spēlis laikā komandom byus juoruoda dažaidi situaceju insciniejumi i sātā sagotovuota prezentaceja.
Suokūt ar 1.maju Rēzeknē, Pilsātys i atpyutys parkā bārni varies apmeklēt vysaidys atrakcejis- ”Viejeņš”, ”Margrīteņa”, ”Jautrī kaļneni”, Sieneite”, ”Šyupeļs” kai arī cytus. Bārnu prīkam itamā godā ir īreikuots arī vīns jauns karuseļs- ”Zylūneits”, kura bilets moksuos 0,40 Ls, bet uz puorejīm cenys palikšūt namaineigys, taitod, nu 15-40 saņtimim.
Iz XXIV Vyspuorejīm latvīšu Dzīsmu i XIV Deju svātkim brauks vysi 16 tautys deju kolektivu skatē pīsadaliejušī Ludzys rajona deju kolektivi. Peic tautys deju kolektivu skatis rezultatu paziņuošonys Ludzys Tautys noma zalā puoršaļce skali applausi. Kaids nu žūrejis komisejis lūceklim rezultatu paziņuošonys breidī pavaicovs: “Kai latgaliski skaņās: “Jius vysi braucot iz XIV Deju svātkim?”.
Latgolys opgoboltīsa atlykuse kriminallītys skateišonu, kurā kaids 1988.godā dzymušīs veirītis apsyudzeits par sovys 78 gadus vacuos babys slepkaveibu. Sakarā ar apsyudzeituo lyugumu nūpratynuot vēļ vīnu līcinieku, tei atlykta iz 20.maju. Izskotūt lītu, tīsa nūpratynuoja gon vysus da šam dasaceitūs līcinīkus, gon arī apsyudzeitū.
Šudiņ plkst. 16:00 Rēzeknis pilsātys kulturys nomā nūtiks jaunīšu muzykaluo paruode “Manc akorc 2008”. Tymā pīsadaleis 120 daleibnīki, vacumā nu 13 leidz 25 godim, kuri muzicej, komponej voi doncoj. Skateituoju i žūrejis viertiejumam tiks pīduovuots 31 prīkšnasums. Žūreja vierties izpiļdeituoju snīgumu divuos nominacejuos – “Vokora akords” i “Vokora pīsitīņs”, bet skateituoji nominacejā “Skateituoju simpateja”. Pauzēs storp muzikaluos paruodis daleibnīku prīkšnasumim kai gosti uzastuos Davgavpils rajona Kulturys noma folklorys kūpa “Dyrbyni”, grupa “DemY-eR” nu Baļtinovys, Laura Bicāne nu Špoģu vydsskūlys i Jeļena Matule nu Rēzeknis. Pasuokuma mierkis ir puļcēt kūpā muzicejūšūs jaunīšus, atteistēt i pylnveiduot jaunīšu muziceišonys tradīcejis, paplašynuot žanru i stilu diapazonu, veicynuot jaunīšu vokalūs, instrumentalū, radūšū darbeibu, kai ari popularizāt talantu izkūpšonu i lītdereigu breivuo laika pavadeišonu.
Šudiņ plkst.12.00 Mežvydu Tautys nomā Ludzys rajonā nūtiks Zemkūpeibys ministrejis (ZM) informativais seminars “Lauku atteisteiba: programma i atbolsts 2007.-2013.godam”. Seminarā lauksaimnīki i cyti interesenti tiks informeiti par Lauku atteisteibys programmys nūsaciejumu aktualitatem, meža nūzaris atbolsta pasuokumim, kai ari par pīvīnuotuos vierteibys paaugstynuošonys pasuokumu atbolsta sajimšonys nūsaciejumim i savstarpejuos atbiļsteibys praseibu īvāruošonu.
Šudiņ Jākubpils rajona padūmis konferenču zalā nūtiks Regionāluos atteisteibys i pošvaldeibu lītu ministrejis (RAPLM) reikuotuo vītejuo pošvaldeibu vadeituoju sanuoksme, kuramā paradzāts skateit vaicuojumus par īdzeivuotuojim snīdzamūs pakolpuojumu pīejameibys i kvalitatis nūdrūšynuošonu piec nūvodu izveidis; pošvaldeibu finanšu izļeidzynuošonys sistemu 2010.godā; īspiejamom izmaiņom teritorejis planuojumu izstruodē piec administrativi teritorialuos reformys pabeigšonys; pošvaldeibu informatizacejis atteisteibys virzīnim nūvodu veiduošonys procesā; par vaļsts mierķdotaceju pošvaldeibu investiceju projektim; finansejuma sajimšonys īspiejom puorrūbežu sadarbeibys programmuos.
Šudiņ plkst.15.00 Davgavpils rajona kulturys nomā Muokslys dīnu ītvorūs tiks atkluota DU muokslys pedagogu i muokslinīku dorbu izstuode “Vēļ vīna muokslys dīna ‘08”.1. i 2.majā nu plkst.12.00 leidz 16.00 atvārtūs durovu dīnys nūtiks tautys lītišķuos muokslys studejis “Klūga” klūgu pinieju darbneicā, bet 7. i 8.majā nu plkst.11.00 leidz 16.00 tei nūtiks arī tautys lītišķuos muokslys studejis “Latgale” keramikys darbneicuos.
Šudiņ ar Margaritys Stārastis puorsoku “Palākīs nameņš” i komedeju krīvu volūdā “Lelle līgavai” Davgavpils teatris gasteis Jākubpils Krystpils kulturys nomā.” Labesteigu puorsoku pošim mazuokīm piec bārnu īmīļuotuos autoris dorba motivim īstudies akters i režisors Ivars Brakovskys.
Šudiņ Rēzeknē, Nacionalūs bīdreibu kulturys nomā, izskaņ Krīvu kulturys dīnys, tuos nūzasliegs plkst.17.00 ar Nacionalūs bīdreibu kulturys noma bārnu deju ansambļa “Ručejok” pīcu godu jubilejis koncertu. Krīvu kulturys dīnys tradicionali jau 15.godu reikoj teatris-studeja “Joriks”, leidztakus itūs dīnu pasuokumim jau vairuokus godus nūteik ari Latvejas studejteatru festivals.