Latgolys Radejis zinis (3.03.2008.)
Šudiņ Latgolys opgoboltīsa planoj skateit kriminallītu, kurā par kukuļjimšonu apsyudzeits Valsts tehniskuos uzraudzeibys agenturys Daugavpils regionaluos dalis vacuokīs inspektors Māris Šaršūns. Saskaņā ar apsyudzeibu kukuļs omotpersonai dūts, lai nūdrūšynuotu kukuļdeviejam traktora vadeituojam aplīceibys izsnīgšonu bez praktiskūs i teoretiskū puorbaudiejumu nūkuortuošonys. Izmekleišonys gaitā nūskaidruots, ka 1969.godā dzymušais Māris Šaršūns 60 latu kukuli pījiems 2005.goda vosorā.Da šudiņdīnys plkst. 16:00 vēļ var īsnīgt projektu dasciejumus Latgolys reģiona atteisteibys agenturys izsludynuotajam Latgolys kulturys programys konkursam, kab sajimtu Vaļsts Kulturkapitala fonda (VKKF) finansiejumu projektu realizeišonai 2008.godā. Konkursa mierkis ir snīgt finansialu atbolstu nūzeimeigim kulturys projektim, kas veicynuotu Latgolys kulturvidis, vierteibu i tradiceju atteisteibu.Projektu dasaciejumi joiīsnīdz Latgolys regiona atteisteibys agenturys (LRAA) birojā personeigi.
AS “Parex banka” reit, 4.martā apbolvuos lobuokūs Rēzeknis slimineicys mediķus, kurus bankys bolvu sajimšonai izvirzie slimineicys mediķu kolektivs. Svineigais apbolvuošonys pasuokums nūtiks Rēzeknis slimineicys 6.stuova zalā plkst.8.30. nu reita. Kai pastuostāja AS “Parex banka” Rēzeknis filialis puorvaldneica Maija Muceniece, svineigajā pasuokumā divim Rēzeknis slimineicys medikim tiks pasnīgti nominacejis aplīcynuojuma roksti, kai ari daškiertys naudys bolvys 200 latu apmārā.
