Latgolys Radejis zinis (29.07.2008.)

Šudiņ, 29.julī, Latgolys Kulturviesturis muzeja Lektoreja zalā plkst.19 nūtiks Eiropys tautu festivalam veļteitys izstuodis “Rāzeknīši i Eiropys tautu festivals” atkluošona. Festivala daleibnīku radūšūs dorbu izstuodi papyldynuos 15 glaznuošonys konkursa daleibnīku fināla dorbi, kurūs vareis īpazeit Rēzekni ituo goda festivala Eiropys daleibnīku acim. Īprīkšejūs godu festivalu daleibnīki izstuodē pīduovoj pošu savuoktus īspaidus, kas vizualiziejuši dažaidūs kruosainūs suvenīrūs i potograpejuos . Izstuode byus skotama leidz 1.augustam.

Eiropys tautu festivala ītvorā 29.julī teik reikuota latgalīšu muzykys nakts. Pīsadola „Likteneigais pagrīzīņs iz Vainovu”, „Borowa MC”, „Bez PVN”, Inga i Normunds. Suokums vinpadsmytūs vokorā. Pi reizis tys byus jau trešais pasuokums koncertturnejis „Taiseits Latgolā” ītvorā. Atbolsta Rēzeknis piļsātys dūme i Rēzeknis Augstškola

Nu 2. leidz 10.augustam Ludzā nūtiks starptautiskuo potograpeju vosorys skūla. Jau trešū godu peic kuortys, Starptautiskuo potograpeju vosorys skūla pīduovoj jaunīšim- potograpim īspieju atteisteit sovys īmanis potograpeju meistardarbneicuos uorvaļstu i vītejūs profesionalu pasnīdzieju vadeibā. Golvonais mierkis ir atteisteit zynuošonys jaunīm potograpim, kuri jau apgivušs itū voi cytu vizualuos muokslys nūzari patstuoveigi, specializeitā vuiceibu īstuodē voi kursūs i kuri gryb sevi radūši pylnveiduot. Itūgod organizatori ir sajāmuši vairuok kai symts dasciejumi nu 13 vaļstim.

2.augustā, plkst.19 Jākubpils muzeja breivdobys nūdaļā “Sēļu sāta” nūtiks 2.starptautiskais tautys muzykys festivals “Lustis Jākubpilī”. Pasuokuma apmekleituojim byus īspieja na tikai baudeit dažaidu stilu i žanru muzyku, bet arī pošim jimt daleibu dzīduošonā i doncuošonā kūpā ar kapelu “Lakstingele” nu Kretingys (Lītovā), tautys muzykys ansambli “Rakari” nu Davgavpils, kapelu “Kreicburgas ziķeri”, folklorys kūpom “Balsi”, “Rūtoi” i “Skutelnieki”, deju kūpom “Aija” i “Damdari”.