Latgolys Radejis zinis (28.10.2008.)
Šudiņ Daugavpils Universitātē suocās i leidz 29. oktobram turpynojās starptautiska zynuotniska konference ““Ebreju teksts” Eiropys kultūrā”, informej Daugavpils Universitatis Sabīdriskūs attīceibu i informacejis dalis vadeituoja Vita Viļevko. Konferencē pīsadola 34 daleibnīki nu Izraelys, Krīvejis, Latvejis, Lelbritanejis, Lītovys i Ukrainys augstškolom i pietnīciskajim centrim. Starpdisciplinarā gaisūtnē jī apsprīž ar ebreju kulturys i viesturis specifiku saisteitus vaicuojumus, kai arī problemu spektru, kas saisteits ar ebreju kulturys recepceju Eiropys kulturys i mentalajā telpā.Rēzeknē šudiņ visim interesentim byus pīejams “Tymsais treilers”, kuramā byus īspiejams īpazeit naredzeigu cylvāku ikdīnu. Kab veicynuotu sabīdreibys izpratni i ījiuteibu pret naredzeigajim vaļsts īdzeivuotuojim, iztaiseits “Tymsais treilers”, aicynojūt ikvīnu īsajust naredzeiga cylvāka ikdīnā.
Laikā nu 19. leidz 26. oktobram Jākubpilī, Reigys īlā, pagaidom nanūskaidruotys personys ītykušys Krustpils evangeliski luteriskajā bazneicā i apzoguš dīvnomu. Nu bazneicys zagli pajāmuš rituala traukus nu bolta metala, īspiejams, zagli nūdūmuojuš, ka trauki ir nu sudobra.
Sastdiņ, 1. novembrī, vīnūs, Rēzeknē Latgolys kulturviesturis muzejā, nūtiks ašņa donoru kusteibai veļteits tematisks pasuokums saimem “Pilīns sirdī”. Pasuokuma dalinīkim byus īspiejams vaira dazynuot par ašņa puorlīšonu, apsavērt ašņa puorlīšonys prīkšmetus, izspēlēt spēli par veseleigu dzeivis veidu, puorsalīcynuot par ašņa nūdūšonys drūšeibu, kai arī pīsadaleit cytuos aktivitatēs muzeja specialista pavadeibā.
