Latgolys Radejis zinis (28.04.2008.)
![](https://lpr.gov.lv/wp-content/uploads/2005/dezuratteli/79.jpg)
Šudiņ nūzaslādz Rēzeknis Socialuos apryupys puorvaldis reikuotuo Leldiņu lobdareibys akceja, kurys laikā pilsātys tryuceiguokī īdzeyvuotuoji bez moksys varie sajimt korstys pušdinis. Pīcu dīnu laikā Naktspatversmis telpuos (J.Raiņa īlā 9b) nu plkst. 12.00 da 14.00 triuceiguokī pilsātnīki varie suoteigi papušdiņuot.
Lobkluojeibys ministrejis eksperti kūpā ar Vaļsts socialuos apdrūšynuošonys agenturys specialistim turpynuos informiet īdzeivuotuojus par aktualitatem penseju jūmā, dēļ tuo šudiņ jī apmeklies Preiļus, bet 7.majā tiksīs ar jākubpilīšim. Lobkluojeibys ministris presis sekretare Gunta Skrebele pastuosteja, ka informativī seminari ir ploši apmekleiti i īdzeivuotuoji aktivi izmontoj īspieju uzzynuot jaunumus penseju jūmā i sjimt atbiļdis iz interesejūšim vaicuojumim.
Maltys bārnu i jaunīšu centrs 30.aprelī plkst.16.00, reikuos jaunatnis iniciativu projektu ”Īkuop cyta čuņuos”. Projekta mierkis ir aktualiziet toleraņcis i īcīteibys vaicuojumus jaunīšu vydā. Finansiali tū atbolsta Rēzeknis rajona padūmis Izgleiteibys puorvalde, Eiropys Savīneiba i Sorosa fonds, kai ari Maltys pogosta padūme. Pasuokumā aicynuoti pīsadaleit Rēzeknis rajona jaunīši vacumā da 20 godim. Interesenti šudiņ veļ pādejū dīnu var dazasaceit Maltys JBC (Parka īlā, Malta), telepons uzziņom-4621843. Jaunīšus planuots īsaisteit rodūšūs dorbu izstuodē, kolažu veiduošonā, aktivuos rūtaļuos i diskusejuos.
Daugavpiļs tīsa planoj skateit lītu par Davgavpiļs kopu apsmīšonu 2006.goda augustā. Apsyudzeiti divi 15 godus, vīns 16 godus i vīns 14 godus vacs jaunīts. Apsyudzeiba calta piec Kriminallykuma 228.panta 2.dalis. Par itaidu lykumpuorkuopumu paredzāta breiveibys atjimšona leidz sešim godim voi naudysstruope leidz 100 minimaluom mienešolgom. Izmekleišonā nūskaidruots, ka kopus pusaudži apgsmiejuši 2006.goda 25.augusta vokorā, byudami alkahola reibumā.
Apreļa beiguos pošvaldeibys AS “Daugavpiļs syltumteikli” planoj suokt syltumteiklu trašu rekonstrukceju pilsātys centralajā daļā. Rekonstrukcejis dorbu dieļ leidz 20.juņam tiks puortraukta korstuo iudiņa pīguode 142 muojom Saulis, Gimnazejis, Cītūkšņa, Mihoelsa, Viestura, Reigys, Luočplieša, Alejis, Imantys, Kr.Valdemara, Vīneibys, Daugovys i Teatra īlā. Sakarā ar itū rekonstrukceju mynātajā laika pūsmā byus īrūbežuota transporta kusteiba.