Latgolys Radejis zinis (28.02.2008.)
Šudiņ Preiļu nūvoda dūmis siedē planuots apstyprynuot Preiļu nūvoda pošvaldeibys policejis darbinīku formys tārpa dizainu. Preiļu nūvoda dūmis siedē taipat planuots lemt par spieļu zala atvieršonu Preiļūs, par atbolstu Preiļu rajona padūmei kredita jimšonai, par pošvaldeibu vīnuotuos informacejis systemys izmontuošonu Preiļu nūvoda Socialajā dīnestā i cytim vaicuojumim.Šūreit braukšonys apstuokli pa vaļsts golvonīm i pyrmuos škirys celim ir apmīrynūši, tai līcynuoja vaļsts AS “Latvejis Vaļsts ceļi” operativuo informaceja. Daudzvīt ir apgryutynuota braukšona pa ūtruos škirys autocelim Latgolā – Bolvu, Davgavpils, Jākubpils, Kruoslovys, Ludzys, Preiļu i Rēzeknis rajonā.
Paguojušajā dīnnaktī nadaudz pazalelinuojušs kravys automašynu ryndys iz Latvejis i Krīvejis rūbežys Terehovys i Grebņevys rūbežkontrolis punktūs. Šūreit Terehovā ryndā gaideja 450 kravys automašynys, kas ir par 50 vairuok nakai trešdinis reitā. Grebņevys rūbežkontrolis punktā šūreit ryndā gaideja 180 kravys automašynys, kas ir par 10 vairuok nakai vakar.
Moksa par pierts apmekliejumu Rēzeknē arī turpmuok nazamaineis i pilsātys pensionari, 1.,2.,3.grupys invalidi i triuceiguos personys varies apmekliet pilsātys sabīdriskū pierti moksojūt par tū tikai Ls 1, deļ tuo, ka Rēzeknis pilsātys dūmis siedē atbalsteits Socialuos apryupis puorvaldis lyugums par papyldu leidzekļu (Ls 2270) daškieršonu. Leidzekļu dašķieršona tyka pamatuota ar tū, ka pierts pakolpuojumu snīgšonu pilsātā nūdrūšynoj individualīs komersants ”Sauna”, kas nu ituo goda 1.marta planuoja paaugstynuot moksu par pierts apmekliejumu. Sovukuort Socialuos apryupis puorvaldei daškiertī leidzekli kompensies moksys pazalelynuošonūs.
