Latgolys Radejis zinis (25.02.2008.)
Šudiņ Rēzeknī nūtiks radūšūs arhitektu pleners metu konkursam “Daudzfunkcionalais centrs – Austrumlatvejis koncertzals Rēzeknī”. Plenēru organizej Rēzeknis piļsātys dūmis Atteisteibys puorvalda “Rēzeknis Biznesa centrs” sadarbeibā ar dūmis Kulturys puorvaldi i Byuvvaldi. Kūpeigi apskateit koncertzala biuvnīceibys vītu i izzynuot projekta saikni ar strukturfondu finanseituojim piļsātvidis pasuokumu projektim, plenarā aicynuoti pīsadaleit arhitekturys i projekteišonys biroju, ministreju puorstuovi, sadarbeibys partneri i mūziki. Plenera suokums planuots Rēzeknis dūme plkst.14.30.Nu šudinis da 30.juņam Eiropys Regionaluos atteisteibys fonda (ERAF) projekta “Publiskuo interneta punktu izveide Latgolys reģionā” gaitā Latgolys planuošonys reģionā planuots izveiduot 150 taidus interneta punktus, kas byus apreikuoti ar miebelem i pīeejami sabīdriskai izmontuošonai. Tī atsarass Davgavpilī, Rēzeknē, Davgavpils, Rēzeknis, Kruoslovys, Ludzys, Preiļu i Bolvu rajonūs, vītuos ar īrūbežuotu interneta pieeju i nūsegs vysu Latgolys planuošonys reģiona teritoreju. Projektu realizej biedreiba “Latgolys reģiona atteisteibys aģentura” sadarbeibā ar pošvaldeibom.
Rēzeknis tīsa šudiņ plkst.10.00 planoj skateit kriminallītu, kurā par 18 godus vacuo jaunīša nūtrīkšonu, braucūt alkahola reibumā, apsiudzeits bejušais Bolvu rajona Policejis puorvaļdis policists Aigars Pužulis. Pārnuo goda maijā lītys izskateišonu tīsa atlyka, lai varātu veikt papyldu tīsu mediciniskū i autotehniskū ekspertizi. Sovukuort septembrī skateišona tyka atlykta iz nanūteiktu laiku, deļ tuo, ka vēļ nabeja sajimtys autotehniskuos ekspertizis rezultati nu Vaļsts tīsu ekspertižu biroja. Pošlaik Rēzeknis tīsa ir sajāmuse ekspertizis rezultatus i var turpynuot skateit itū lītu.
Līpuojis pošvaldeiba piec Rēzeknis pošvaldeibys uzaicynuojuma šudiņ gasteis Rēzeknē. Līpuojis dūmis prīkšsādātuoja pyrmuo vītneica Silva Golde, dūmis izpilddirektora vītnīks Didzis Jēriņš i Līpuojis Atteisteibys puorvaldeibys vadeituojs Vilnis Vitkovskis pīzadaleisīs Austrumlatvejis daudzfunkcionaluo centra – Rēzeknis koncertzala – metu konkursa radūšajā plenerā i daleisīs pīredzē par Līpuojis koncertzala “Lelīs Dzintars” projekta virzeibu.
Šudiņ plkst.13.30 Jākubpils rajona padūmis telpuos nūtiks Jākubpils rajona teritorejis planuojuma 2008.-2020.godam ūtruo sabīdriskuos apsprīsšonys sanuoksme. Sanuoksmē aicynuoti pīzadaleit teritorejis planuojuma izstruodys vadeibys grupys lūcekli, vaļsts i pošvaldeibu īstuožu specialisti, navalstiskuos organizacejis i īdzeivuotuoji.
Paguojušajā dīnnaktī pīaugušys kravys automašynu ryndys iz Latvejis i Krīvejis rūbežys Terehovys i Grebņevys rūbežkontrolis punktūs. Šūreit Terehovā ryndā gaideja 560 kravys automašynys, kas ir par 160 vairuok nakai vakar reitā. Savukuort Grebņevys – 220, kas ir par 70 vairuok nakai vakar.
Daudzus godus tukša i nivīnam eisti navajadzeiga Ludzys rajona Briģu pogostā “Nūlyktava” ituo goda janvarī kļuva par četrdesmit vīnys SIA juridiskū adresi. Nav izslāgts, ka itei adrese varātum kliut populāra i tū kai sovu juridiskū adresi varātum nūruodēt arī vēļ cyti uzjāmumi. Briģu pogosts atsarūnās natuoli nu Zilupis. Āka, kurei ir 41 kompānejis juridiskuo adrese, varātum byut pat sova veida rekords, deļ tuo, ka atpalīk tikai nu Reigys, Kalķu īlas 2 – 19, kurā kompaneju skaits ir vēļ leluoks. Pats par sevi itys nav nūzīgums, bet tei nūteikti ir pazeime, ka vyss nav eisti kuorteibā. Kaidi ir nūdūmi, tys juoprosa īpašnīkam, taču fakts, ka notekūšū navar uzskateit par normalu situaceju, ir skaidrs jebkuram logiski dūmojūšam cylvākam,”tai šudiņ atzeimeja Nozīdzeigi īgiutū leidzekļu legalizacejis nūviersšonys dīnesta prīkšnīks Viesturs Burkāns.
