Latgolys Radejis zinis (24.09.2008.)
Šudiņ Daugavpilī, Latvīšu kultūrys centra Ovālajā zalā, nūteik opoluo golda diskuseja “Daugavpils bizness ekonomiskuos krīzis apstuokļūs. Regionāluos problemys i īspiejis”. Pasuokuma dalinīki tiks informāti i diskutēs par pošreizejū ekonomiskū stuovūkli Latvejā, par ražuošonys, tierdznīceibys, transporta nūzaris dorbu Daugavpilī, par situaceju nūdūkļu apmoksys jūmā Daugavpilī, par piļsātys saimnisteibys komunikaceju rekonstrukcejis gaitu i citim svareiguokim vaicuojumim.Sakarā ar gaisa temperaturys pasazamynuošonu Jākubpils dūmis prīšksādātuojs Leonīds Salcevičs izdevs reikuojumu nu šudiņdīnys Jākubpilī suokt apkuris sezonu. Suokumā apkure tiks dasslāgta pyrmsškolys izgleiteibys īstuodem i školom.
Šudiņ Daugavpilī turpynoj gasteit Zvīdrejis viestnīks Marts Stefansons i ituos vaļsts uzjiemieju delegaceja. Daugavpilī Zvīdrejis uzjiemeji planavoj tiktīs ar vītejuos pošvaļdeibys vadeibu, īpasazeit ar uorpiļsātu i apmeklēt vairuokus uzjāmumus.
Šudiņ Daugavpils Universitātē suonkās i leidz 26. septembram turpynuosīs Sirds veseleibys dīnys, informej DU Sabīdriskūs i informacejis dalis vadeituoja Vita Viļevko. Sirds veseleibys dīnuos ir īspiejams izmiereit sovu pulsu i ašņaspīdīni, nūsaceit glikozis i holesterina leimini ašnī, kermeņa masys indeksu, plaušu vitalū kapacitati i izviertēt sova vydukļa apkuortmāru.
