Latgolys Radejis zinis (24.04.2008.)
![](https://lpr.gov.lv/wp-content/uploads/2005/dezuratteli/79.jpg)
Šudiņ Daugavpilī, gastneicā “Hotel Dinaburg”, nūtiks seminars “ES un valsts atbalsts inovatīvu risinājumu ieviešanai ražošanā”. Seminara mierks ir īpazeistynuot uzniemejus, biznesa atbolsta institucejis ar ES fondu i vaļsts atbolsta instrumentim ražuošonys modernizacejai i inovaceju īvīšonai. Seminara daleibnīkim tiks snīgta informaceja par golvanajim pūsmim ražuošonys modernizacejis i inovativu rysynuojumu īvīšonys procesā, kai ari tyks skaidruoti intelektualuo eipašuma izmantuošonys nūsacejumi. Runuots tiks ari par atbolstu, kaidu snīdz Eiropys biznesa atbolsta teikls, par jaunim rysynojumim uznāmuma ražuošonys modernizacejā, par jaunim produktu veidim.
Šudiņ nu Rēzeknis Muokslys i dizaina vydsškolys suoksīs tradicionalais Muokslys dīnu guojīns, kas cytus godus izavērts par jautru, skaņom i kruosom bogotu guojīni pa Rēzeknis īlom, īsaistūt ari garomguojējus. Piec Muokslys dīnu guojīņa plkst. 16.00 Festivala parkā nūtiks instalaceju i masku konkurss “Kaķis”, muokslys dorbu izsūle, mūdis skate, dažaidi konkursi i citi ituo goda Muokslys dīnu devīzei “Māksla ir strīpaina” atbylstūšys aktivitatys.
Kruoslovys kulturys noma telpuos šudiņ plkst.18.00 nūtiks bīdreibys “Auto-moto sports” dybynuotuoju sapuļce. Bīdreiba teik veiduota ar mierki atteistēt piļsātā auto – moto sportu, pīsaistēt ituo sporta veida atteisteibai projektu leidzekļus, organizēt Kruoslovys i Latgolys mārūga sacenseibys. Atbaļstēt bīdreibys veiduošanu i īsasaistēt tuos dorbā aicinuotys personys vacumā nu 18 godim.
Latgolys pūdnīku dīnuos nūteik Atvārtūs durovu dīna Latgolys keramiķu darbneicuos. Atvārtūs durovu dīna nūteik Rēzeknis Muokslys i dizaina vydsškolys keramikys darbneicā, Pītera Gailuma darbneicā “Podnieki”, Jura Krompāna darbneicā, Aivara Ušpeļa darbneicā “Dzyndrys”. Da 26. apreļam Rēzeknis rajonā turpynuos tradicionaluos Latgolys pūdnīku dīnys ar cepļu dadzynuošonu i izstuodem.
Šudiņ plkst. 18. 00 Daugavpilī, kinoteātrī ”Renesanse” nūtiks džeza muzykys koncerts. Koncertā pīsadaleis Sauszemes spāku orkestris, dirigents Roberts Saulevičs, pyuteju orkestra saksofonistu kvartets, vadeituojs Jānis Briška, Latviešu kultūras centra (LKC) “Jazz-band”, vadeituojs Arnolds Grīnberts i LKC džeza ansamblis, vadeituoja Irina Grīnberte. Kai gūda gosti uzastuos vokaluo grupa “Jazz-Island” nu Viļnis.
Šudiņ Jākubpiļs rajona padūmis telpuos nūtiks seminars par myužizgleiteibys īspiejom. Seminarā tiks diskutāts par myužizgleiteibu Latvejā, par adiministrativū reformu, par školu i pīaugušū izgleiteibys īspiejom Eiropys Savīneibys myužizgleiteibys programmā. Pīsadalēt seminarā aicynuoti navalstiskūs organizaceju puortuovji, Jākubpiļs rajona pošvaļdeibu i īstuožu vadeituoji. Seminaru organizej Jākubpiļs Tuoluokizgleiteibys i informacejis tehnologiju centrs.
Aizvadeitajā dīnnaktē byutiski palelynuovušuos kravys automašynu ryndys iz Latvejis i Krīvejis rūbežys. Šūreit Terehovys rūbežkontrolis punktā izbraukšonu nu vaļsta gaida 1000 kravys mašynys, kas ir par 300 vairuok nakai vakar, bet Grebņovā ryndā gaida 414 transportleidzekļi, kas ir par 46 myuozuok naikai vakar. Kūpumā iz rūbežis kravys automašynu skaits pasaslelynovīs par 21 %, sasnīdzūt 1414 kravys automašynu.