Latgolys Radejis zinis (23.05.2008.)
![](https://lpr.gov.lv/wp-content/uploads/2005/dezuratteli/79.jpg)
Tīslītu ministrs Gaidis Bērziņš (TB/LNNK) šudiņ dūsīs dorba vizitē iz Rēzekni, kur jis tiksīs ar Rēzeknis augstškolys studentim. Bērziņš augstškolys tīseibu zynuotņu studentim lasēs lekceju “Komersanta tīsiskuos aizsardzeibys aspekti”. Pēc lekcejis ministram paredzāta tikšonuos ar studentim i pasnīdziejim, kurys laikā tiks puorrunuoys aktualitatis lykumdūšonā, tūstorp komerctīseibu jūmā.
Šudiņ Jiekabpilī, Krustpils saleņā, suoksīs i 24.majā turpynoisīs pēc kuortys jau pīktais pasuokums “100% vosorys suokums”. “AJV grupys” Jiekabpilī reikuotī breivdobys sezonys atkluošonys pasuokumi jau klivuši par lobu tradiceju. Šūgod ar dūmu aptvert piec īspiejis leluoku sabīdreibys daļu jubilejis pasuokuma organizatori īceriejuši tū reikuot divys dīnys. Šudiņ pasuokumā uzastuos grupys “Ēnas”, “Dzelzs Vilks”, “Forte”, kai ari daudzu dzīšmu remiksu autors Roberts Lejasmeijers. Sovukuort 24.majā pasuokumā apmeklātuojus izklaidēs grupys “Apvedceļš”, “Credo”, “Labvēlīgais Tips” i Igo Fomins.
Šudiņ plkst.11 Kruoslovā tiks atkluots Prīdainis skotu tūrņs i nūtiks eiroreģiona “Azaru zeme” desmit godu jubilejis sanuoksme, Prīdainis skotu tūrņs INTERREG IIIA programmys projekta “Velo maršrutu teikla atteisteišona Baltejis Azaru zemē” gaitā uzbyuvāts ainaviskā vītā pi Kruoslovys. Nu tuo pazaverās skots iz Daugovys lūkim, Kruoslovu i rūbežu ar Boltkrīveju. Skotu tūrņs, leidzeigi kai vysi puorejī projekta laikā lobīkuortuotī i izveiduotī objekti, vysim interesentim ir pīejams bez moksys.
Šudiņ Rēzeknē saisteibā ar svineigū pasuokumu “Beidzamais školys zvons” pi pīminekļa “Vīnuoti Latvejai” vairuokūs pilsātys īlu pūsmūs tiks īrūbežuota satiksme, nu plkst.11 leidz 14 tiks slāgta transporta kusteiba Atbreivošonys alejā, pūsmā nu Pulkveža Brīža īlys leidz Bazneicys īlai. Sovukuort nu plkst.12.30 leidz 14 kusteiba tiks slāgta pūsmā nu N. Rancāna īlys leidz Bruoļu Skrindu īlai, Pulkveža Brīža i Bazneicys īluos, kai ari pūsmā nu Duorza īlys leidz V.Seilis īlai.
Šudiņ Višķu estrādē nūtiks Daugavpils rajona bārnu dzīšmu i deju festivala “Pīneņu laikā”. Nu plkst. 8.30 leidz 12.30 paredzāti Bārnu dzīšmu i deju festivala daleibnīku mieginuojumi. Vizualuos muokslys darbneicys svātku daleibnīkim suoksīs plkst.12, bet svātku koncerts – plkst.14. Daugavpils rajona Bārnu dzīšmu i deju festivals nūzaslēgs plkst.15.30 ar pasuokumu svātku daleibnīkim.