Latgolys radejis zinis (21.04.2008.)
![](https://lpr.gov.lv/wp-content/uploads/2005/dezuratteli/79.jpg)
Šudiņ da plkst.13.00 navarās veikt tehniskū apskati Ceļu satiksmis drūšeibys direkcejis (CSDD) Jākubpils rajona nūdaļā. Transportleidzekļu vaļsts tehniskū apskati navarās veikt elektreibys padevis trauciejumu dieļ. Vadeituoju kvalifikaceja i transportleidzekļu reģistraceja byus pieejamys bez izmaiņom.
Reit plkst.17.00 Latgolys Centraluos bibliotekys (LCB) laseitovā nūtiks literars pasuokums, kurā tiks prezenteita gruomota “Goru vaļsteibā” i nūtiks tikšonuos ar tuos autori rakstneici nu Rēzeknis – Lindu Mareju Kundzišu. Romana varūne Linda ir pīmīleiga meitine, kura uorejā veidūlā ni ar kū naatsašķir nu sovim vīnaudžim. Sovukuort piec vacuoku nuovis jei īsaguoduojuse nalelu, jauku privatsātu, caur kurys lūgu radzami vaci, nūslāpumu pylni, baisi kopi… Īrastū dzeivis ritmu i dvēselis mīru apdraud napīpiļdeita mīlesteiba i sapyni par idealū veirīti, kurš līkās tuols i naaizsnīdzams… Tod Lindys dzeivē īnuok šarmantīs Delšads…
Da 27.apreļam Rēzeknē nūtiks starptautiskais muokslinīku pleners “Dūmys liduojums”. Kai pastuosteja Kulturys puorvaldis vadeituoja, pleners nūtiks ūtrū reizi i īprīšk tymā pīsadalejās 23 muokslinīki nu Latvejis, Italejis i Boltkrīvejis. Itūgod plenerā aicynuoti pīsadaleit muokslinīki nu Zvīdrejis, Sardinejis, Boltkrīvejis i Lītovys. Bez īdvesmys giušonys i apkuortnis ainovu īmyužynuošonys audeklā i eļļā, muokslinīki pīsadaleisīs arī Muokslys dīnu guojīnī 24.aprelī nu Rēzeknis Muokslys i dizaina vydsskūlys, kas īprīškejūs godūs kliva par jautru, skaņom i kruosom boguotu guojīni pa Rēzeknis īlom, īsaistūt guojīnī arī garomguojiejus.
Augstuokuos tīsys Kriminallītu tīsu palātā šudiņ plkst.10.00 reitā apelacejis kuorteibā paredzāts izskateit kriminallītu, kurā par bolsu uzpierkšonu pošvaldeibu vieleišonuos apsiudzāts Rēzeknis bejušais mers, tagadejais dūmis prīšksādātuoja vītnnīks Juris Začests, kai arī Grigorijs Bekasovs i Olga Skutāne. Pārn 22.novembrī kriminallītys izskateišona tyka atlykta par vairuokim mienešim saisteibā ar Začesta advokata Juoņa Grīnberga īsnīgumu. Pyrms tam tīsa lītys izskateišonu atlyka, deļ tuo ka iz tū slimeibys dieļ nabeja īsarads pats Začests.
Preiļu 2.vydsskūlā muokslys dīnu ītvorā itamā nedelī nūtiks dažaidi pasuokumi. Šudiņ byus Informativuo dīna, kurymā paradzāta īsapazeišona ar planuotim pasuokumim. Sovukuort reit radūšuo darbneica „Speiguleišu pasaulī”, aizreit plkst.14.20 taipoš radūšuo darbneica „Dīdzeņa breinumainais ceļuojums”. Caturdiņ i pīktdiņ radūšuo stuņde suokumskūlā. Sastdiņ paradzāta dorbu izstādes noformēšana, bet svātdiņ jau izstuode kulturys centrā, kuru byus īspiejams apsavērt nu plkst.17.00
Dīnnakts laikā kravys automašynu ryndys iz Latvejis i Krīvejis rūbežys byutyski nav mainiesīs. Šūreit Terehovā izbraukšonu nu vaļsts gaideja 650 kravys automašynys, kas ir par 50 mozuok nakai vakardīnys reitā. Sovukuort Grebņevā rynda ir sazamazynuojuse par 10 mašynom, prūti šūreit tymā stuoveja 500 mašynys.