Latgolys Radejis zinis (21.02.2008.)
Vīns nu leluokajim dorba deviejim Rēzeknē elektoinstrumentu ražuotuojs, uzjāmums “Rebir” pavasarī atlaiss vīnu tyukstušu darbinīku. Atsasaucūt uz naoficialu informaceju roksta laikroksts “Bizness&Baltija”, taidejaidi nu 1200 tagad uzjāmumā struoduojūšajim bez dorba napaliks vīn 200 cylvāki. “Rebir” jau janvarī dorbovās vīn divejis nedelis, sovukuort febralī darbinīki atlaisti bezolgys atvalinuojumā, līcynoj informāceja portālā www.delfi.lv
Šudiņ Daugavpilī suokās i leidz 23. febraļam turpynosīs VII Masku tradiceju festivals. Festivalu īvadeis Latgolys muokslys skūlu audziekņu dorbu izstuodis “Maskas” atkluošona kinoteatrī “Renesanse”. Drupeit vieļuok Krīvu nomā tiks atkluota Viesturiskūs personažu vaska figuru izstuode. Sovukuort plkst. 19:00 Latvīšu kulturys centrā suoksīs festivalā gostkolektivu prezentaceja i sasadzyguošona kūpā ar tautys muzykys ansambli “Rakari”.
Šudiņ Ludzys rajona padūmis sēdē planuots lemt par leidzfinansiejuma nūdrūšynuošonu pansionata “Ludza” āku renovacejis projektam. Ludzys rajona padūmis sēdis dorba kuorteibā īkļauti arī vaicuojumi par leidzfinansiejuma nūdrūšynuošonu projektam “Ludzas rajona sporta skolas stadiona rekonstrukcijas I kārta”, vaļsts programmys bārnu i saimis stuovūkļa uzlobuošonai 2008. godam gaitā eistynojamū projektu, par Ludzys rajona padūmis bārnunoma-patversmis nūlykuma apstyprynuošonu, par Ludzys rajona padūmis Atzineibys roksta dašķieršonu i citi vaicuojumi.
Šudiņ ES informacejis agenturys puorstuovs gasteis Jākubpils rajona Solys vydusskūlā ar skūlānim dūmuotū spēli „40 minūtēs apkārt Eiropai” i Eiropys karti. Dīnys laikā vairuokys klasis izspēlēs izgleitojūšū spēli par ES vaļstim, zynomim cylvākim, sportu, geografeju, viesturi, politiku i kulturu. Jaunuokūs klašu školānim byus īspieja salikt lela izmāra Eiropys karti – puzli.
