Latgolys Radejis zinis (20.08.2008.)

Prokurors Andris Škutāns īsnīdzs kasācejis protestu par Latgolys apgoboltīsys sprīdumu bejušuo Bolvu policista Aigara Pužuļa lītā, Škutāns lyudz atcelt sprīdumu i apelācejis instancē skateit lītu atkuortuotai cytā tīsys sastuovā. “Mani naapmīrynoj nūzīguma kvalifikāceja – tei palyka taida poša kai pyrmajā instancē – Krimināllykuma 260.panta 2.daļa. Uzskotu, ka alkohola kluotbyutne Pužuļa organizmā ir pīruodeita i pīruodejumi ir ryupeiguok juoizviertej,” sacie prokurors.

Leivānu nūvoda Rūžupis pogostā itūmienes uzsuokts Rūžupis pamatškolys internāta telpu remonts. Tiks sakuortuots pībraucamais ceļš pi pogosta puorvaļdis ākys, kur koncentrāti arī puorejī pakolpuojumu snīdzieji – posts, veseleibys punkts, biblioteka, sabīdriskais centrs, pyrmsškolys grupa i školys internāts. Kūpumā remonts pošvaļdeiba izmoksuos 22600 latus.

Nedelis beiguos Rēzeknē, Vaļsts rūbežsardzis koledžā, nūtiks III starptautiskuos dīnesta suņu biatlona sacenseibys “Latveja 2008”. Daleibai sacenseibuos pīsasacejuš vairuok kai 40 kinologi ar sovim sunim nu Latvejis, Lītovys i Igaunejis. Kai nūvāruotuoji sacenseibys tiemēs Krīvejis Federacejis Rūbežsardzis puorstuovji.

Preiļu pylsātā septeņuos daudzdzeivūkļu sātuos tiks veikta īkšejuos sultumapguodis sistemys skoluošona. Tuos ir sātys, kuru dzeivūkļu īpašnīki pārnajā apkuris sezonā moksuo vysleluokū moksu par patārātū syltumenergeju. Dorbi tiks veikti septembra mienesī i oktobrī, tī tiks pabeigti leidz apkuris sezonys suokom.