Latgolys Radejis zinis (20.05.2008.)

izvakar Kuorsovā rūbežsorgi aizturāja septeņus Kolumbejis pylsūņus ar vyltuotom Šengenys vīzom. Kai informeja Vaļsts rūbežsardzis (VRS) Presis i sabīdriskūs attīceibu dīnesta golvonuo inspektore Kristīne Pētersone, mineituos personys tyka aiztureitys Ludzys puorvaļdis Kuorsovys II kategorejis dzelzceļa rūbežkontrolis punktā i pi visim septenim Kolumbejis pylsūnim rūbežsorgi atroda vyltuotys Spanejis Šengenys vīzys. Par nūtykušū uzsuokti septeni atseviški kriminalprocesi, turpynojās izmekleišona.

Daugavpilī izgleiteibys īstuožu remontim itūgod planuots izlītuot aptuveni 3,5 miljonus latu. Vīns nu leluokīm projektim ir saisteits ar Daugavpils Pūļu vydsškolys ākys renovaceju. Tuo izmoksys 1 milj. 400 tyukst. latu.Ūtrs leluokīs projekts ir Daugavpils Vaļsts gimnazejis internata ākys renovaceja. Tei izmoksuos aptuvenai 700 000 latu. Taipoš Ls 270 000 itymā godā ir atvieleite izlītuot Daugavpils 15.vydsškolys, 17.vydsškolys i Centra gimnazejis ādynuošonys bloku renovacejai.

Šudiņ plkst. 13.00, Rēzeknis rajona padūmē nūtiks svineigs pasuokums „Vaļsts olimpiažu i zynuotniskūs konferenču laureats 2008”. Pasuokumā tiks sumynuoti Rēzeknis rajona školāni, kas ituo vuiceibu goda laikā uzruodeja augstus rezultatus Izgleiteibys satura i eksamenacejis centra nūsaceitūs vuiceibu prīkšmetu vaļsts i nūvoda olimpiadēs, kai ari jūs školuotuoji. Kai informeja Rēzeknis rajona padūmē pyrmū raizi laureatim tiks pasnīgtys arī naudys bolvys. Šūgod no Rēzeknis rajona tiks apbolvuoti 2 nūvoda i 6 vaļsts mārūga laureati.

23.majā, Rēzeknē saisteibā ar svineigū pasuokumu “Pādejais školys zvons” pi pīminekļa “Vīnuoti Latvejai” vairuokūs pilsātys īlu pūsmūs tiks īrūbežuota satiksme. Svineigais pasuokums nūtiks plkst.13.00, tradicionali vīnkūpus puļcejūt pylsātys vyspuorizgleitojūšū školu 12.klašu školānus. Saisteibā ar absolventu guojīni nu Rēzeknis 2.vydšskolys i Latvejis Bankys Rēzeknis filialis leidz pīminekļam “Vīnuoti Latvejai” nu plkst.11 leidz 14 tiks slāgta transporta kusteiba Atbreivuošonys alejā, pūsmā nu Pulkveža Brīža īlys leidz Bazneicys īlai.

Kai informej pašvaldeibā, leidz 24. majam, laikā nu plkst.8.00 leidz 19.00 byus īrūbežuota guojieju kusteiba puori Rēzeknis upi Nikodema Rancāna īlā. Šaidi īrūbežuojumi nūsaceiti, jamūt vārā SIA byuvfirmys „Ceļli i tylti” guojieju tylta veicamū rekonstrukceju. Savukuort, nu 26. maja leidz 30. septembram iz ceļa A12 Jākubpiļs – Rēzekne – Ludza – Krīvejis rūbeža (Terehova), 65,92. km, nūtiks tylta puor Malmuti rekonstrukceja. Lyugums īvāruot kusteibu regulējūšuos ceļa zeimis.

Bolvu dūme izsludynuojuse konkursu “Balvenietis 2008” treis nominacejis – “Izpaleidzeiguokais kaimiņš”, “Uztycamuokais draugs” i “Lobuokais darbinīks”. Konkursā var byut puorstuovāti Bolvu pylsātys īdzeivuotuoji, uzjāmumu, īstuožu darbinīki, kuru kandidaturys leidz 13.juņam var dasaceit pylsātys īstuožu, organizaceju i uzjāmumu darbinīki i īdzeivuotuoju grupys. Pīteikuma anketai var pīvīnuot gon plašuoku aprokstu, gon potografejis. Konkursa uzvarātuoji tiks nūsaukti i gūdynuoti Bolvu pylsātys dzimšonys dīnys pasuokumā 28.juņī.