Latgolys Radejis zinis (19.09.2008.)

22. septembrī ASV viestnīks Latvejā Čārlzs Larsons apmeklēs Daugavpils bārnu nomu “Prīdeite” i jims daleibu ASV viestnīceibys finansātuo sporta laukuma atkluošonys pasuokumā. Viestnīks tiksīs arī ar Daugavpils dūmis prīksšādātuoju Ritu Strodi. Itys projekts ir vīns nu vairuokim, kurūs ASV viestnīceibys Aizsardzeibys sadarbeibys birojs eistynoj kūpā ar Latvejis vaļdeibu i Nacionalajim bruņuotajim spākim.

Šudiņ i reit, 20. septembrī, Sanktpēterburgā nūteik 1.starptautiskuo latgalistikys konference “Ontona Skrindys Latgalīšu gramatikai – 100”. Konferencē uzmaneiba tiks davārsta latgalīšu volūdys normiešonys viesturei i principim, izlūkšņu i rokstu volūdys mejīdarbei, teoretiskuos gramatikys vaicuojumim, latgalīšu volūdys lūmai Latvejis izgleiteibā, daiļliteraturys tapšonys procesim, tuos lūmai volūdys atteisteibā.

Šudiņ Daugavpilī, Kulturys i sporta pilī, suokās i reit turpynuosīs tradicionaluos uzjiemieju dīnys “Daugavpils 2008”. Uzjiemeiju dīnuos sovu produkceju i pakolpuojumus prezentēs Daugavpils i Reigys firmys kai arī Nīderlandis, Vuocejis i Pūlejis firmu puorstuovnīceibys Latvejā. Izstuodē byus puorstuovātys kūpumā vairuok nakai 60 uzjiemiejstrukturys.

Daugavpilī nūtykušajā opoluo golda diskusejā par Eiropys Savīneibys fondu leidzekļu efektivuoku apgivi vītejī uzjiemieji pauduš naapmīrynuoteibu saisteibā ar ES fondu leidzekļu apgivis mehanismu. Kai govonūs tryukumus uzjiemieji minieja apšaubamu praseibu izvirzeišonu projektu eistynuotuojim i napījamamai lānū projektu virzeibu institucejuos, kuruos nūsadorboj ar projektu izviertiešonu i apstyprynuošonu.