Latgolys Radejis zinis (19.06.2008.)

Šudiņ ostonim Zylupis orūdvydsškolys audzieknim svineigi tiks izsnīgti Ministru kabineta reikuojumu izroksti par pylsūneibys īgiušonu. Jaunūs pylsūņus svineigajā ceremonejā, vīnūs dīnā sveiks NP Rāzekņys reģionāluos nūdaļys vadeituoja Rita Zommere, kai arī pošvaldeibu i vuiceibu īstuodis vadeiba.

Šudiņ Tīseibsorga birojā apbolvuos školānu konkursa “Kod Tev ir juobāg i Tāva zeme i vyss, kū meiļoj, juopamat” uzvarātuojus. Kūpumā konkursam dorbus īsyutiejuši 40 bārni i jaunīši nu vysys Latvejis, tūstorp arī nu Kruoslovys i Ludzys rajonim. Konkursa mierkis ir veicynuot bārnu i jaunīšu izpratni par biegļu tematiku kai vīnu nu cylvāktīseibu aspektim, aicynuot jūs aktivi paust sovu vīdūkli par biegļu problemom. Kūpumā sajimti- 21 zeimiejums i 19 esejis.

Šudiņ ASV viestnīks Latvejā Čārlzs Larsons apmekļās Latgolu. Vizitys laikā Larsons tiksīs ar organizaceju puorstuovim, kas sajāmuš dažaidu atbolstu humānuos paleidzeibys projektu gaitā, kū organizej ASV armeja. Jī īsapazeis ar Daugavpils viesturiski nūzeimeigom vītom. Dīnys pyrmajā pusē Larsons apmeklies bārnu socialuos apryupis centru “Kalkūni” i jims daleibu ASV vaļdeibys sponsoreituo lifta atkluošonys ceremonejā. Dīnys ūtrymā pusē viestnīks tiksīs ar Mičiganys nacionaluos gvardis medikim, kas itymuos dīnuos snīdz veseleibys konsultacejis Latgolys regionā.

Kena parkā Jākubpilī paguojušajā, 18. juņa, naktī uzadorbuojuš pagaidom nazynomi vandali. Ap pusē divim naktī, jī izdemolieja 12 naseņ īreikuotys laternys, sovukuort Krustpils pusē iz Reigys īlys apmāram desmit minotu vāluok apguoze divys dekorativuos puču piramidys. Pošvaldeibai i pylsātys īdzeivuotuojim nūdareitī zaudiejumi ir vysai īvāruojami.

Pyrma dūšonuos iz Pasauļa latvīšu treiszvaigžņu spieļu 15 godu jubilejis sacenseibom Valmīrā, kas nūtiks nedelis nūgalē – nu 21. leidz 23.juņam, iz draudzeibys spielem Jākubpilī īzaras treis uorzemu latvīšu komandys. Sacenseibys ar simbolisku bumbys īmetīni basketbola grūzā atkluos Jākubpiļs pylsātys pošvaldeibys deputats Vladimirs Ždanoks.

Vaļsts ašņa donoru centra Latgolys filiale informeja, ka šudiņ teik organizeita donoru dīna Ruguojūs! Donori ir gaideiti pogosta padūmis telpuos nu plkst. 8.30 -12.00! Vysi teik aicynuoti byut atsauceigi i atbaļsteit donoru kusteibu. Jau ziņuojam, ka paguojušejā donoru dīnā 13. martā ašni zīduoja 69 donori!