Latgolys Radejis zinis (19.02.2008.)
Šudiņ iz sātu Daugavpilī dūsīs treineiši, kas Čamaņu saimē pasauļē nuoce 31.janvarī, Paula Stradiņa Kliniskajā universitates slimneicā. Pošvaļdeiba sūla saimei snīgt paleidzeibu – planuots daškiert naudys pobolstu 1500 latu apmārā i ikmieneša naudys pabolstu puortykys īguodei. Taipat ir saguoduots zīmys i vosorys rateņu komplekts, kai ari teik dūmuots par paleidzeibu auklis atolguošonā. Piec vacuoku saceituo, treineiši jiutuos labi.
Šudiņ pl. 12.00 Daugavpilī piec remonta durovys viers Latgolys centraluo biblioteka. Bibliotekys telpys ir na vīn izremontātys, bet ari klivušys plašuokys. Izremontātajā bibliotekā dorbuosīs diveji abonementi i treis laseitovys. Tei byus apreikuota ar jaunom mēbelem, tehniku vuojredzeigim cylvākim i interneta pīslāgumu. Bibliotekys telpuos dorbuosīs ari ES informacejis punkts. Jaunajuos telpuos piļneigi nūmaineita apkuris sistema, īreikuota ventilaceja i uzstuodeiti kondicioneri. Remonts izmoksuova 400 tyukst. latu. 2008. godā četrstuovu ākā planuots rekonstruēt kuopņu telpu i uzstuodēt liftu, taidā veidā padorūt biblioteku pīejamuoku cylvākim ar eipašom vajadzeibom.
Nu šudynys da 21. febraļam leitsiudyņa kanalizacejis kolektora avarejis rekonstrukcejis dieļ tiks slāgta satiksme Rēzeknē, Latgolys īlys pūsmā nu Tiņanova īlys da Duorzu īlai. Sabīdriskajam transportam byus īspieja kursēt itamā ceļa pūsmā, sovokuort puorejū transporta leidzekļu vadeituojim juosekoj ceļazeimu nūruodem.
Šudin Preiļu nūvoda dūmē i nūvoda uznāmumūs gastēs Boltkrīvejis generalkonsuls Daugavpilī Genādijs Ahramovičs, lai puorrunuotu sadarbeibys vaicuojumus. Preiļu nūvoda dūmē pl. 11:00 Boltkrīvejis generalkonsulam paradzāta tikšanuos ar pošvaļdeibys vadeibu i Planuošonys dalis specialistim. Vāluok Ahramovičs apmeklēs šyušonys uznāmumu “VS Teks”, AS “Preiļu siers” u.c.
Viļānu Rūmys katuoļu bazneicā pl. 18.30 nūtiks tikšanuos ar vjetnamīti Lenu Čī Vunu. Jei šūbreid dzeivoj Dīvamuotis paruodiešonuos vītā Medžugorjē. Viļānūs Lena daleisīs sovā pīredzē par Dīva i Dīvamuotis kluotbyutni Medžugorjē.
Šūreit iz Latvejis i Krīvejis rūbežys Terehovys rūbežkontrolis punktā izbraukšonu nu vaļsts gaideja 500 kravys automašinys, kas ir par 100 mozuok nakai vakar. Grebņovys rūbežkontrolis punktā kravys automabiļu ryndu nav.
19.febralī plkst. 10:00-17:00 Rēzeknē, dūmis mozajā sēžu zalā nūtiks Apvuiceibu seminars školānu i studentu pošpuorvaļžu daleibnīkim i avīžu redaktorim par veiksmeigu sadarbeibu i saikni ar presi. Seminaru reikoj Eiropys kusteiba Latvejā.
