Latgolys Radejis zinis (17.03.2008.)
Šudiņ Davgavpils muokslys vydsškolā “Saulis školā” nūtiks seminars “Muoksla bez rūbežom”. Seminara daleibnīki īsapazeis ar “Saulis školu” i tymā eistynojamū profesionaluos īvirzis izgleiteibys programmu, ar projektu “Muoksla bez rūbežom”, ar Marka Šagāla i Marka Rotko daiļradi, pīsadaleit Vitebskys vosorys nūmetnis “Muoksla bez rūbežom” i Rotko plenēra “Saulis školys” audziekņu dorbu prezentacejā i debatēs. Pasuokumu reikoj “Saulis školys” metodiskais centrs.Rēzeknis rajona Izgleiteibys puorvaldis izsludynuotajā konkursā par finansejuma daškieršonu jaunatnis iniciativu projektim 2008.godā sajimti ostoni projektu dasaciejumi. Tūs īsnīgušs Nautrānu, Kaunatys, Maltys i Dricānu pogostu izgleiteibys īstuodis, Maltys i Viļānu Bārnu i jaunīšu centri, jaunīšu klubs “Still” un Latvijas Sorkonuo krysta Rēzeknis komiteja. Konkursā īsyuteitūs projektu dassciejumus planuots izvierteit da Leldiņom, deļ tuo ka dažu projektu eistynuošona īplanuota jau apreļa suokumā.
Itymā trešdinē Ludzys rajonu apcīmuos socialuos apryupis studenti nu Avestas gimnazejis (Zvīdreja). Teik planuots, ka gosti apcīmuos pansionata „Ludza” i “Nirza” īmeitnīkus, kai arī tiksīs ar bārnim nu Ludzys rajona bārnu noma-patversmis.
Iz Latviejis i Krīvejis rūbežys izbraukšonu nu vaļsts gon Terehovys, gon Grebņevys rūbežkontrolis punktā šūreit gaida 200 kravys automašynys. Terehovys rūbežkontrolis punktā dīnnakts laikā rynda sarukuse, vakar nu reita izbraukšonu nu vaļsts tī gaideja 370 kravys automašynys.
