Latgolys Radejis zinis (16.09.2008.)
Kab Rēzeknē varātum atjaunuot syltumenergejis ražuošonu i pīguodi, Rēzeknis piļsātys dūme vakar, 15. septembrī lāmuse par tīšuo spāka pīlītuošonu, nūdrūšynūt pīeju SIA “Latgales enerģija” 2005. goda iznūmuotajim aktīvim. Kai informej Rēzeknis piļsatys dūmis sabīdriskūs attīceibu nūdalis vadeituoja Diāna Zirniņa itūgod syltumenergejis pakolpuojumus piļsātā nūdrūšynuos pošvaļdeibys kapitalsabīdreibys – a/s “Rēzeknes siltumtīkli” i SIA “Rēzeknes enerģija” navys SIA “Latgales enerģija” kai tys bejs nu 2005. goda.Šudiņ piecpušdinē Augstuokuos tīsys Senata Kriminallītu departamentā byus pīejams nūlāmums kasācejis kuorteibā izskotomajā Bolvu policista Aigara Pužuļa kriminallītā. Par Latgolys apgoboltīsys 4. augusta sprīdumu, ar kurū par jaunīša nuovejūšu nūtrīkšonu ar automašynu apelacejis instancis tīsa policistam beja pīmāruojuse četru godu cītumstruopi, beja īsnīgta gon kasacejis syudzeiba, gon kasacejis protests.
Nedelis beiguos, 19. i 20. septembrī, Sanktpēterburgā nūtiks 1.starptautiskuo latgalistikys konference “Ontona Skrindys Latgalīšu gramatikai – 100”. Konferencē uzmaneiba tiks davārsta latgalīšu volūdys normiešonys viesturei i principim, izlūkšņu i rokstu volūdys mejīdarbei, teoretiskuos gramatikys vaicuojumim, latgalīšu volūdys lūmai Latvejis izgleiteibā, dailliteraturys tapšonys procesim, tuos lūmai volūdys atteisteibā.
Kab veicynuotu jaunīšu aktivitatis i lītdereigu breivuo laika pavadeišonu, septembra beiguos Daugavpilī, Forštatis kulturys nomā, planuots atvērt Jaunīšu centru. Iz itū breidi tūpūšajā Jaunīšu centrā pabeigti telpu remontdorbi i atlics vīn īkuortuot ustobys atbylstūši paradzātajim mierkim.
