Latgolys Radejis zinis (16.05.2008.)
![](https://lpr.gov.lv/wp-content/uploads/2005/dezuratteli/79.jpg)
Šudiņ Daugavpils universitātē (DU) turpynojās 50.starptautiskuo zynuotniskuo konference. Konferences dorbs tiks organizāts eksaktūs, humanitarūs, izgleiteibys, muokslys i socialūs zynuotņu sekcejā. Šudiņ plenarsiedē tiks diskutāts par universitatis, regiona i valsts atteisteibys tendencem Eiropys Savīneibys kontekstā. Konferencē pīsadaleis 412 zynuotnīki nu Latvejis, Lītovys, Igaunejis, Sūmejis, Pūlejis, Vuocejis, ASV, Japanys, Kazahstanys, Krīvejis i Boltkrīvejis. DU 50.starptautiskajā zynuotniskajā konferencis temys tiks apkūpuotys i izdūtys Konferencis ziņuojumu težu i rokstu kruojumūs. Konferenci organizej DU Jaunuo zynuotnīku asociaceja.
Šudiņ Naturalizacejis puorvaldis (NP) Rēzeknis regionaluos nūdalis Informacejis centrā nu plkst.10 leidz 15 nūteik informacejis dīna, kurā pilsātys i rajona īdzeivoituoji tiks informāti par Latvejis pilsūneibys īgiušonys vaicuojumim. Interesenti varēs sajimt informativūs materialus, īsapazeit ar latvīšu volūdys, Latvejis viesturis i Satversmis zynuošonu puorbaudejumu praseibom, kai ari byus īspieja puorbaudeit sovys zynuošonys, aizpyldūt puorbaudejumu praseibom atbylstūšus testus.
No šudiņdīnys da 18.majam Daugavpils universitātē (DU) nūtiks tradicionaluo starptautiskuo zynuotniskuo konference “Slāvu lasejumi”. Konferencis mierkis ir iepazeistynuot ar jaunuokajīm slavu kulturys pietejumim folkloristikā, literaturzynuotnē i volūdnīceibā. Itūgod konferencē pīsadaleis 42 zynuotnīki nu Boltkrīvejis, Igaunejis, Krīvejis, Latvejis, Lītovys, Pūlejis i Vuocejis. Ar Daugavpils dūmis i Valsts pietejumu programmys “Letonika” atbolstu konferenci organizej DU Humanitaruos fakultatis Krīvu literatrys i kulturys katedra.
Šudiņ Valsts rūbežsardzis koledžā (VRK) nūtiks Ūtruos vyuceibu rūtys kadetu zvārasta pījimšona. Svineigais pasuokums nūtiks VRK īryndys laukumā plkst.12.55. Zvārastu par uzticeibu Latvejis Republikai dūs 19 kadeti, kas vuiceibys uzsuoce ituo goda aprelī. Piec sekmeigys goda profesionaluos tuoloikizgleiteibys programys “Rūbežapsardze” apgiušonys jī sajims Valsts rūbežsardzis (VRS) inspektora kvalifikaceju, kai ari tiks pieškierta kaprala dīnesta pakuope.
Nu šudiņdīnys da 2.juņam Daugavpilī nūtiks Starptautiskajai bārnu tīseibu aizsardzeibys dīnai velteiti pasuokumi. Pasuokuma gaitā byus īspieja apmekleit lekcejis par uzvedeibu pi iudinim i ceļu satiksmis nūteikumim. Socialūs lītu puorvaldē paredzātys grupu nūdarbeibys kai bārnim, tai ari vacuokim. Starptautiskuos bārnu tīseibu aizsardzeibys dīnā Socialūs lītu puorvalde organizēs bārnim ekskurseju iz Pilskalnis Siguldeņu.
Starpkultūru dialoga goda laikā Eipašūs uzdevumu ministra sabīdreibys integracejis lītuos sekretariats organizej četru seminaru cyklu “Kulturu dažaideiba Latvejā – nūzeime i atteisteiba”. Seminari nūteik četruos Latvejis pilsātuos. Šudiņ plkst.12 seminars nūtiks Rēzeknē, Rēzeknes augstškolā, bet 21.majā plkst.12.30 seminars nūtiks Daugavpils universitatē, Parādes īlā 1. Seminari paradzāti Latvejis augstškolu darbinīkim, tūpūšajim pedagogim i studentim. Aktivitašu mierkis ir veicynuot starpkulturu dialogu, myusdīnu dinamiskuos i multietniskuos sabīdreibys attīsteibu i īcīteibu sabīdreibā. Golvonuos Starpkulturu dialoga goda aktivitatis ir atkluošonys pasuokums, žurnalistu konkurss, seminari, konference, eseju konkurss skūlānim.