Latgolys Radejis zinis (15.05.2008.)
![](https://lpr.gov.lv/wp-content/uploads/2005/dezuratteli/79.jpg)
Cyutunedeļ 21. majā, desmit stuņdēs Leivuonu Inžinertehnologeju i inovaceju centrā suoksīs apvuiceibu seminars uzjiemiejim par projekta pīsacejuma sagatavuošonu ES atbolsta programom: „Atbalsts uzņēmumu radīšanai un attīstībai” i „Atbalsts ieguldījumiem sīko un mazo komersantu attīstībā īpaši atbalstāmajās teritorijās”.
Nu šudiņdīnys leidz 17.majam Daugavpils Universitatē (DU) jau 50-tū reizi nūtiks ikgadejuo studentu i docātuoju starptautiskuo zynuotniskuo konference. Konferencis mierkis ir pulcynuot vysus zynuotņu nūzaru puorstuovjus, kab veicynuotu diskuseju par zynuotnis atteisteibys īspiejom. Kūpumā konferencē daleibu jims 412 zynuotnīki, augstškolu docātuoji, studejūšī i citi interesenti nu 11 pasaulis valstim (ASV, Boltkrīvejis, Igaunejis, Japanys, Kazahstanys, Krīvejis, Latvejis, Lītovys, Pūlejis, Sūmejis Vuocejis).
Šudiņ sešūs Daugavpils ukraiņu bīdreibā “Mrija” pyrmū reizi nutiks šyupuļdzīsmu koncerts “Volūdu daudz, šyupuļdzīsme – vīna”. Koncertā daleibu jims Daugavpils nacionālūs kulturys bīdreibu kolektivi, uzastuojūt kotrs sovā dzymtajā volūdā. Koncerta laikā tiks apbolvuoti arī šyupuļdzīsmu afišu konkursa uzvarātuoji. Šyupuļdzīsmu vokors īcarāts kai aplīcynuojums saimis i kulturys vierteibom, kas pastuov naatkareigi nu tauteibys i volūdys.
Eipašūs uzdavumu ministra elektroniskuos puorvaldis lītuos sekretariats, turpynojūt izgleitojūšū seminaru cyklu školānim par drūšu interneta lītuošonu, šudiņ Ludzys rajona Zylupis vydsškolā reikoj debašu stuņdi ”Internets – draugs ci īnaidnīks?”. Seminarā sekretariata specialisti vadeis debašu stuņdi, kurā školāni tiks aicynuoti izsaceit sovu vīdūkli i diskuteit gon par interneta prīkšrūceibom, gon ari puorrunuot īspiejamū apdraudiejumu, taipoš jī tiks informāti, kur vērstīs, ja internetā atrosts nalegals ci navālams saturs.
Reigys apgoboltīsa šudiņ planuojuse izskateit niu jau moksuotnaspiejeiguos kompanejis SIA “ATF Būve” paraseibu pret Daugavpils vīsneicys “Park Hotel Latgola” īpašnīku SIA “Pellston nami” i projekta finansātuoju AS “SEB banku” par 433 472 latu pīdziņu.