Latgolys Radejis zinis (15.04.2008.)

Da 18.apreļam Rēzeknis augstskūlys (RA) Ekanomikys fakultatē nūsarysynoj Starptautiskuo nedeļa, kurys gosti -docātuoji nu uorvaļstim voda praktiskuos nūdarbeibys tūpūšīm ekanomistim uzjiemiejim, Starptautiskajā nedeļā docātuoji nu Beļgejis, Lītovys, Portugalis, Slovakejis, Armenejis, Gruzejis, Azerbaidžanys na tikai prezentej puorstuoveituos vaļsts i augstskūlys, bet ari losa lekcejis par interneta sātyslopu dizainu ekanomikys studentim, inovaceju menedžmentu, sporta i ekotūrismu i.c. tēmom.

Kruoslovys rajona Svareņu pogosta padūmis telpuos šudiņ planuota mutiska izsūle ar augšupejūšu sūli, kurā planuots puordūt pošvaldeibys nakustamū eipašumu “Piloti”. Izsūlē planuots puordūt 0,1639 hektaru zemis gobolu i āku ar kūpejū plateibu 131,8 kvadratmetri. Tuo suokumcena 2100 lati.

Šudiņ labvieleigu laika apstuokļu gadejumā Bolvu jaunīši nu iniciativu centra “Free zone” planoj zeimeit grafiti iz nūjaukšonai paradzātuos Bolvu autoūstys sīnom. Pošlaik Bolvūs, Breiveibys īlā 57/59b, nūteik autoūstys rekonstrukceja i modernuo tierdznīceibys centra izveide. Bolvu jaunīši dūmē viersēs ar īsnīgumu atrast pīmāruotu vītu, kur izapaust grafiti muokslinīkim. Apsverūt īspiejis, jauņīšim tyka pīduovuots grafiti zeimiet iz autoūstys fasadis. Ari autoūstys puorbyuvis projekta atteisteituoji SIA “Alpha Development” pīkryta itai idejai.

Reigys opgoboltīsa šudiņ paredziejuse tīsu debatēs SIA “Latgales enerģija” īsnīgtuos syudzeibys lītā par tīsys lāmumu nūdrūšynuot SIA “Rezeknes enerģija” pārnejuo goda nūgalī īsnīgtū praseibu, kurā lyugts pīdzeit 815 690 latu moksu par dobysgāzi. Jau ziņojam, ka “Latgales enerģijai” pārn roduos finansialys gryuteibys, kuru dieļ uzjāmumam beja sarežgiejumi syltumapguodis nūdrūšynuošonai piļsātā.