Latgolys Radejis zinis (14.10.2008.)
Paguojušajā nedeļā syltumapguode atjaunuota Rēzeknis centra rajonā, kur dzeivuotuojim var tikt pīslāgta gon apkure, gon nūdrūšynuota korstuo iudiņa padeve. Leidz ar tū syltumapguode atjaunuota itymā rajonā asūšajuos školuos i bārnuduorzūs, sovukuort Rēzeknis slimineica nūlāmuse, ka tai syltumapguodis pakalpuojumu atjaunuošona byus vajadzeiga itūnedeļ, i kai paviestie Rēzeknis piļsātys dūmis sabīdriskūs attīceibu nūdalis vadeituoja Diāna Zirniņa Zīmeļu rajona īdzeivuotuojim korstais iudiņs tiks padūts ituos nedelis beiguos, bet apkure tiks nūdrūšynuota nuokušnedeļ.Pīktdiņ, 17. oktobrī, vīnūs ar aizlyugumu Ciskadu Rūmys katuoļu bazneicā suoksīs Latgolys pūļu muižnīka i rakstnīka Kazimira Buinicka 220 godu jubilejis pasuokums, informie Rēzeknis rajona padūmis sabīdriskūs attīceibu specialiste Laura Ieviņa.
Paguojušajā dīnnaktī turpynuo sasamazynuot kravys automašynu ryndys iz Latvejis i Krīvejis rūbežys. Terehovys rūbežkontrolis punktā izbraukšonu nu vaļsts šūreit gaidie 990 kravys automašynys, kas ir par 110 mozuok nakai pyrmudinis reitā. Sovukuort Grebņevys rūbežkontrolis punktā izbraukšonu nu Latvejis itūreit gaidie par 70 transportleidzeklim mozuok nakai vakar, kūpā 180.
Caturdiņ, 16. oktobrī, divuos stuņdēs Rēzeknis piļsātys kulturys nomā atkluoj Latvejis Republikys proklomiešonys 90. godadīnai veļteitu ceļojūšu potograpeju i prīkšmetu izstuodi “Drūšeiba i kuorteiba – Latvejai 90.” Izstuode byus apsaverama leidz 22. oktobram.
