Latgolys Radejis zinis (14.03.2008.)

Šudiņ Jākubpils rajona padūmis konferenču zalā nūtiks Jākubpils rajona Civiluos aizsardzeibys komisejis siede. Sanuoksmē Jākubpils Civiluos i dorba aizsardzeibys dīnesta vadeituojs Edgars Līcis raksturuos īprīškejū godu situaceju Jākubpils rajonā. Valsts guņsdzieseibys i gluobšonys dīnesta Jākubpils brigādis komanders Miervaldis Tomiņš snīgs puorskotu par gluobšonys dorbim i gunsgrākim rajonā 2007.godā. Sanuopksmis daleibnīki uzklauseis ari cytu atbildeigūs valsts dīnestu informaceju par Jākubpils rajona aktualitatem i dorba specifiku.

Šudiņ izgleiteibys i zynuotnis ministre Tatjana Koķe (ZZS) dorba vizitē apmeklies Daugavpili, kur īsapazeis ar pylsātys i rajona izgleiteibys aktualitatem. Plkst.11.00 jei apmeklies Daugavpils Krīvu liceju i tiksīs ar pylsātys dūmis prīšksādātuoju Ritu Strodi, pošvaldeibys puorstuovim i školu direktorim. Stuņdi piečuok Koķe apmeklies Daugavpils rajona padūmi i tiksīs ar padūmis prīšksādātuoju Janīnu Jalinsku, kai ari rajona puorstuovim i rajona školu direktorim. Savukuort plkst.14.00 ministre gasteis Daugavpils universitatī, kur tiksīs ar rektoru, profesoru Arvīdu Barševski i studentim. Koķe pīzadaleis ari Davgavpils universitatys Satversmis 15.godadīnai velteitejā svineigejā siedē.

Šudiņ plkst.16.00 Jākubpils bārnuduorzā “Zvaņeņš” nūtiks piecpušdine vactietenim i vacmāmeņom. Pasuokumā skanies tuo tematikai atbylstūšys tautys dzīsmis i tiks izpiļdeitys kusteibu rūtalis. Vacvacuoki sajims bārnu rūkom gatavuotys duovanenis – cuoleišus. Pasuokums nūzaslāgsīs ar kūpeigu čaja dzeršonu. Taida veida piecpušdine bārnuduorzā teik reikuota jau na pyrmū godu. Tuos mierkis ir īpazeistynuot mozuļus ar senejūs latvīšu dzeivisveidu i saimis tradicejom, kai ari vuiceit jūs nūviertāt sovu vacvacuoku zynuošonys i prasmis.

Šudiņ plkst.19.00 Jākubpils rajona Vīseitis kulturys nomā Daugavpils teatris uzastuos ar īstudiejumu “Labdien, sievasmāt!”, kas taps piec krīvu rakstnīka Sergeja Belova dorbu motivim. Leidzeigi kai cytys meitinis, ari ituos izruodis varūne Inga sapņoj izīt pi veira. Ingys leigavaiņs Vils pyrms kuozom gryb īsapazeit ar nuokamū sīvysmuoti. Tak jei siež cītumā. Lai nazaudietu leigavaini, Inga īzasaistuos avanturā, kurā teik īvylkti vysi izruodis varūni… Izruode ir caurausta ar humoru, jautrom dejom i smīkleigom situacejom. Daudz jautreibys skateituojim saguoduos ari nagaideitais finals. Izruodi latvīšu volūdā īstudiejs Latvejis teatra skateituojim jau labi pazeistamīs režysors nu Moskovys Mihails Mamedovs.